خطاب النهر والبحر (المتطرف) هو رد فعل لخطاب الهامش والمظلومية

من أحاجي الحرب ( ١٤٣١٨ ):
○ كتب: أ.عبدالدائم نوري
خطاب النهر والبحر (المتطرف) هو رد فعل لخطاب الهامش والمظلومية والشماليين اكلوا حقوقنا . انا شمالي كادح ساكيها من الزراعة للخليج فجأة القه روحي ماكل حق زول ما بعرفه ومقوم خطاب كامل مشيطني ومفهمنه السويته من عرقي في الحقيقة حقه لكن انا اكلته . طيب انا عندي تجربة مع الجنجويد استباحوا حقي بنفس الخطاب هنا حتوقع شنو؟ انك لما تلقه فرصة حتكرر نفس القصة . هنا رد الفعل شنو ؟ يا دار ما دخلك شر ديك بلدكم ودي بلدنا واي زول يمسك حقه عليه . فلو عاوز وحدة تحارب خطاب المظلومية ده في دارك وتتبرا منه واحنا بنحارب ليك النهرجية ونتلاقى نبني وطن واحد .

لكن طول مافي خطاب هامش حيكون في خطاب نهر وبحر والوحدة بتستحيل . عندك خطاب بشيطن الشمالي حيظهر خطاب يشيطن الغرابي والمنطقي لما تشوفوا بعضكم شياطين تتفارقوا . مافي وحدة في ظل شيطنة ، مافي وحدة مع خطاب جلابة وشريط نيلي وهامش ومركز ونهر وبحر .

وحدة يعني اشوفك كويس وتشوفني كويس ، لكن تشوفني ظالم واشوفك حاقد حنتوحد كيف؟