الرشاقة عندك

غير اللون.. أول حاجة تلفت نظرك للأنثى هي قوامها وتفاصيلها.. ثم بعد كدا لما تقرب منك.. تتوغل في باقي التفاصيل أول شي الوشي.. والوشي السمح سمح.. نسبية مكونات الوشي ليها دور في التكوين العام لجمال الوشي.. زي العيون.. النخرة الخشم.. الحواجبين.. الجضوم.. الحنكات.. الجبهة..
العرب عندهم المرا أم عيون كبار.. دي ياها السمحة من زماااااان وهم في رايهم دا.. لكن أفرض عيونا كبار وباقي الحاجات كعبة وشينة.. هنا طوالي العيون من كبار وسمحات.. يتقلبن لي عيون مطيّرات..
لكن كمان برضو في عيون صغار لكن سمحاااات ومملوكات.. وماشات مع باقي التقاطيع.. اما لو كانن مشاترات باقي التقاطيع.. يقولوا ليها شينات وزي قدود الجلد..
أقول أي خلل في أي عضو من اعضاء الوشي يجوط الوشي كلو ويلخبطو.. وهنا بتاعة الكوفير الممتازة لو دايرة تغشنا بعروس أو غيرها.. تحاول تدس الشي الكعب وتركز على الشي السمح في الوشي.. أما لو كان مافي ولا شي سمح.. الناس ترضى بالقسمة.. وبتاعة الكوافير تكون أمينة مع نفسها أولا ومع الناس وتقول ليهم بكل صراحة الوشي دا مافي أي طريقة لحام ليهو.. تشيلوهو كدي وتقابلو بيهو خلق الله والبينضم تكسروهو كسر صاح.. يقول علماء الجمال بنسبية الجمال.. لكن عندهم مقاييس ليهو.. لقيت في بعض المواقع الإسفيرية المهتمة بالجمال..
إن الرشاقة من أولى صفات الجمال.. الرشاقة غير القتلت إشراقة.. رشاقة إشراقة هي شلاقة أدت إلى حتفها.. بنياتنا الله يستر عليهن رايح ليهن الدرب.. دايرات يسمنن وإن شاء الله يتخفجن ويقعدن المهم يكونن سمان.. وصلاتي على النبي تبراهن.. الدايرة تسمن تعرف هي قاعدة تسمن من وين في جسمها؟.. في واحدات قاعدات يسمنن تحت حنكاتن بس.. الواحدة بعد أسبوع من الشحن تجيك زي الكديسة.. وفي واحدات قاعدات يسمنن من رقبتن وبس.. الرقبة تبقى غليدة ومدردمة والوشي صغيروني وغاتس في الرقبة.. وواحدات قاعدات يسمنن في ضرعاتن”ضُراع”.. تبقى زي الملاكم.. وواحدات يسمنن في البطن..
التناسق في أعضاء الجسم مهم.. عشان تسر العين وربنا يسهل عليها وتلقى ليها عريس.. لقيت في الموقع بعض المقاسات كان ينفعنكن:
محيط الصدر= نصف الطول + 3 سم
محيط الخصر = نصف الطول – 15 سم
محيط الذراع = الطول مقسوم على 6
محيط الرقبه = الطول مقسوم على 5 ثم إضافة (1)
باقي المقاسات كوسن لهن برااااكن
الطول هو طول الجسم.. وعشان هو الأساس المقسات بقيت عليهو.. يعني لو واحدة طولها مية وخمسين سم.. مفروض محيط رقبتها يكون واحد وتلاتين سم.. المقاسات دي بالمتر العادي تاخدنها.. غايتو جنس شقاوة في الدنيا دي!.. الله يا زاكي يا العولمة كان شغلتينا في رقبتنا!!!!!!