منو القال انت سافرت

منو القال انت مني بعيد؟!

بحسك نبضي في الشريان…

وأحسك في قليبي وريد

بتدخل روحي زي كل يوم…

وتطلع مني بوح وقصيد

وأشيلك في العيون إنسان…

وأشوفك فرحة زي العيد

وسافر شيل معاك الشوق…

وخلي عيوني للتسهيد

وعااارف إني بيك ولهان…

وإنى معاكا هاني سعيد

زماني العشتو من دونك…

وحاتك ما بعدو أكيد

وليلي المرا دون عينيك….

بمر في الحسرة والتنكيد

عبيرك عبا كل الكون…

وصوتك ردد أحلى نشيد

ملاذك مأوى من الخوف…

ومن الحيرة والتشريد

لقيتك وفيك حنان منساب…

يذوب فيني أي جليد

تعال نفتح مجال للود…

ونمشي طريقنا إيد في إيد

معاك اتبددت أحزان…

كبر.. جوانا أحلى وليد

وفاض نيل الأماني تساب

ولبست روحي حلم جديد

بحبك.. ومافي أبداً زول..

بحبك زيي بالتحديد

وأريدك ريدة ما كانت…

ومين الزيي تاني بريد؟!!!!

منو القال انت سافرت…

منو القال.. انت مني بعيد؟!

تلويح:

ليس الغياب بمُقص عنك لي أملاً.. إن السماء تُرجى حين تحتجب