حكاية زوجة اسمها “ننوش”

(فانتازيا)

غازّة سماعات الموبايل في اضنيها.. ووشيها باين عليهو حزن و.. هم شديد.. وكل مرة تشيل نفس وتخت نفس.. مرقت السماعات.. وعافرت الموبايل، طقشت اضنيّ.. غنية من الموبايل يظهر جديدة بصوت المطرب أحمد بورصودان تقول:

(شال رقمي ما اتصل

الخايف منو حصل)

قلت لها: يا بنيتي هو متين شال الرقم؟

قالت: امبارح يا عمو..

قلت لها تعاطفا معاها وتثبيتا لقلبها: كدي اصبري واديهو تلاتة أيام..

قالت وهي مطيّرة عيونا جزعا: اها لو ما اتصل بعد التلاتة أيام؟

قلت لها وأنا أحس بالسؤال الزنقة: “فوضي امرك لله.. وصلي صلاة الغائب”

(سن الضهب):

ركب سن دهب بسامة..

كان يعتقد انها تزيده وسامة

فأصبح يبتسم بسبب وبدون سبب.. وينوم فاتح خشمو.. فرحا.. وبوبارا..

قابلته قالت ليهو: “انت زمااااان نضمت معاي في نضم عرس.. دحين انا ما عندي مانع”

ماشي ويناقش في نفسو: “السارة دي زمااااان مكجنناني وقت قلتها داير اعرسك قربت تدقني.. حسي غيرت رايها، فهمها شنو؟ غايتو قلبي ماكلني من تالاها..”

ثم ادرف وهو في غاية الجدية بعد ان برم طاقيتو فوق راسو تلاتة برمات” يا ربي تكون السارة دي داخلة علي طمع، من شافت سن الضهب دي؟.. بعرسها.. علا عاد التشوف البينوم لها فاتح خشمو منووووووو؟”

(جلابية بيضا مكوية):

اشترى جلابية جديدة عاجباهو.. لعرس ود عمو في البندر.. وكله أمل في أن يغري بنوت الخرتوم بالجلابية الجديدة.. فهمه أن بنات البندر متفلهمات وما بيشتغلن بيهو

لبس الجلابية يوم العرس وهو يتابع قيافته من خلال ضُلو.. حفلة عصراوية بفنانة دلوكة

بعد الغدا وقف يصلي العصر بالجماعة..

كان إماما.. قام من سجود الركعة الأولى في هذه الأثناء في الخيمة صدحت المطربة بصوت جهور..

(جلابية..

بيضا مكوية..

حبيبي بيسحروك ليّ)

واقف في صلاتو وخلى الجماعة وقبل علي اتجاه صوت المكرفون ورفع يدو اليمين مبشرا

!!!!!!!”هيع.. ابشري.. حرم تبشري.. بت اللزينا

(ننوش):

اسمها نوال بيدلعها يقول ليها “ننوش”

قرأ لها خبرا في إحدى الصحف: “إحدى الخواجيات كانت كاتبة اسم حبيبها بوشم في ضراع يدها الشمال تعبيرا عن حبها الشديد له.. اكتشفت انه بيخونها.. زعلت واتحرقت.. قطعت محل الوشم بسكين.. ورسلتو ليهو بالـ(دي إتش إل)”

بعد هضم الخبر..

عاين لها وقال ليها وهو يبتسم ابتسامة مودة وحب وتفاؤل: “أنا إسمي مكتوب وين يا ننوش؟”

ردت عليهو وقالت: “إنت؟.. اسمك مكتوب في كراس الدكان البنديّن منو”!!!!

عاين لها وهو مفجوع.. ثم طلب منها أن تناوله ليمونة.