“غفيفير”.. يحب “فطومة”

مدخل:-
الحب هو: فسبكة(فيسبوك).. أو وطسبة (واتساب).. أعجاب.. تبادل صور.. تبادل مشاعر.. تبادل رصيد.. يبدأ باتنين جنيه.. وينتهي بمئات الجنيهات.. ثم.. اختفاء أحد الطرفين.. أو اختفاءهم الاتنين.. ثم يظهرو في محل تاني.. وتبدأ دائرة الحب العولمي..
قصة غرام قلبين:-
بعد العَشا.. ملص الجلابية وقعد بالعراقي رقد علي قفاهو فوق العنقريب ثم اتشهّق وسألني سؤال مصيري” انت يا جنا.. الحب دا كيفنو.. الزول يعني بي يحس بشنو؟”.. أخذت أبحث عن إجابة تناسب عبد الغفار والذي تدلعة أمه بـ (غفيفير).. واخذنا كلنا نناديه بـ (غفيفير).. بالرغم من اقتناعنا التام أنه لا يستحق هذا الدلع.. ولكنها المجاملة قاتلها الله.. تخليك تدلع الكُدُندار.. وتعجِّن الخنفسانة.. وتكسر تلج لكل ذات مخلب وناب..!
قبل أن تتداعى الإجابة إلى ذهني نطا هو قال لي “يعني الزول بي يحس بي نغمشة كدي؟”.. لقد انقذني غفيفر من عناء الإجابة.. بهذه النغمشة.. قلت ليهو “ايوا بالضبط كدا.. بي يحس بي نغمشة”…. ثم قال لي” خلي بالك.. فطومة ست الشاي دي مكسرة فيني.. وأنا حسي، حااااااااسي بي نغمشة من تالاها”.. كوعتّ وعاينتّ ليهو وقلت ليهو “كيف عرفت أنها.. بتحبك ومكسرة فيك؟؟؟؟”.. قال لي بعد أن جدع ايديهو حول راسو وشبكن في بعض ثم طرقع اصابعيهو وهو راقد على ضهرو “لما أجي أشرب عندها شاي.. تكب الشاي في الكباية.. وتعاين لي وترفع حواجبيها وتقول لي: غفيفر.. سكرك كيف؟”.. أخذتني دهشة وأنا أحاول أن استجمع كل معرفتي عن أسرار الحب.. وألقى حتة أخت فيها وأضاير جملة الحب “سكرك كيف”.. وبينما أنا أقلب في قاموس الحب بحثا “عن النغمشة وسكرك كيف؟”.. باغتني بسؤال تعسفي قائلا “إت يا جنا، في حياتك دي كلها.. ابدا في واحدة رفعت ليك حاوجبيها؟”.. قلت ليهو بدون أن أفكر”أبدا” ضحك ضحكة كبيرة شميت فيها رائحة الشماتة، وقال لي وهو يقاوم الضحك الذي كاد أن يقضي عليه قائلا “ات كان كدي ما جزاب” …. فعلمت إنني نلت نسبة 45.6%.. في الجاذبية!! وأنني ساقط في مدرسة غفيفير وفطومة..
مخرج:-
خلقوهن اتنين..
جني.. و.. جِنِك
جني صادف جِنِك
يا المافي اتنين مِنِك..
بحبك غصباً عن عين ابوكي
وعين أهلك.. وبحبك غصباً عنِك
مهداه إلى الأستاذة المطربة قندران بحري.. تغنيها مدى الحياة.. وكيف لا؟ وهي المطربة التي غنت للنهب المسلح في غنيتها العاطفية والتي سمعتها باضاني دي وكان يرقص عليها الحسان والصبيان ويكوكرو “ورورووووووك”:-
(كفت…. ولفح
ما بخليهو..
حبيبي السمح)….
بالرغم من أنها لم توضح ح تكفت منو؟ أو تلفح منو؟.. لكنني أقول اللّهم لا تسلط علينا من لايرحمنا..
واللّهم إني أسألك حسن الخاتمة…. أكعب حاجة الزول يموت وقد كفتتو ولفحتو مطربة وخاصة لو لابسة عدد اتنين خاتم حجم لستك الركشة!!
حكمة عجبتني جدا مكتوبة في ركشة بي ورا الحكمة هي: (رضا الوالدين أهمّ من أبوك وأمك)..