تعلم كيف تُحبِط الآخرين

الإحباط مهنة ومتعة.. عند بعض الناس.. يحبط كل من يراه فرحان مبسوط.. ما داير أي زول في الدنيا دي يكون فرحان أو أي حاجة تانية.. داير النكد للناس.. من طرف.. ويصل مرحلة لما ما يلقى زول يحبطو يحبط نفسو.. بنفسو.. يشتري بنطلون جديد.. ويكون عاجبو يلبسو يعاين لي روحو.. “بنطلون سمح والله.. ما بيستاهل الكريعات المكلوجات ديل”..

الإحباط عند بعضهم متعة شديدة..

الإنسان المُحبِط شخص بايخ جدا.. حيث أن البياخة من أهم ركائز ودعائم الإحباط وما بيخجل ومغسل وشيهو بي مرقة ويعتبر دي شفافية.. وماحساس.. أصلو ما بيحن على الهدف.. وكل ما ظهرت بوادر الإحباط على الهدف كل ما زاد انبساطو وفرحتو وحبورو.. وتلقاهو قعد يقرقر ويضحك. .

الاستعداد الفطري لأن تكون شخص محبط “تحبط الآخرين” مهم جدا.. وهو بيكون واضح من انت شافع.. يعني لو حبوبتك جاتكم تكورك وتنطط تقابلها “حبوبة الشينة جات.. حبوبة الشينة جات” وتسيرها لحدي جوا البرندة بنفس الهتاف.. أو تجي لجدك الراقد ومركبين ليهو قسطرة وتقول ليهو”جدو؟؟ يا اح انت ح تموت متين؟.. تحلينا نتفرج.. في الناس البيجو البيت؟”

عندما تكبر ولتمنية وتطوير سلاح الإحباط في داخلك.. أبدأ تمارينك من البيت.. يعني لو جيت داخل ولقيت المرا مغيرة تسريحة شعرها ولابسة كويس ومجيهة عشان تقابلك.. أول حاجة تعمل نفسك ما شايف.. حتى لو جات قعدت وقابلتك وقعدت تعاين ليك منتظرة منك تعليق إيجابي.. عاين ليها.. وقول ليها “مالك بتعايني لي كدي عاملة شعيراتك الطايرات.. ديل.. ودا شنو الدلاقين المعلقاهن في راسك دا.. وحسي هدومك دي كلها ما لقيتي غير القميص المعولق دا؟.. وعليكي الله حسي دي حنة ترسميها؟.. عاملة كدا زي مرتبة حمودي ولدي.. القاعد يبول فيها.. وبعدين دا شنو ظاعطة لي حواجبيكي ومقابلاني؟”.. في الشارع تشتغل احباط.. أي زول عندو حاجة عاجباهو تمسخها عليهو.. جارك لو اشترى عربية تقيف تمسخها عليهو.. يسألك رايك شنو في العربية. تقول ليهو” لكن مالك جايبها مستعملة؟.. وبعدين النوع دا يومين ويبوظ.. ويرقد لك في ايدك.. حتى لو داير تبيعها ما تلقى اليشتريها.. لو في حفلة وفي فنان بيغني اقعد قدااااام جنب وشيهو كل ما يعاين ليك اتشهق.. كل ما يعاين لك اتشهق ليهو في وشيهو، عشان يحبط ويخلي الغنا ليوم القيامة.. في الشغل احبط زملاءك.. العندو قميص جديد.. أو موبايل جديد.. اصلو ما تخلي يتهنى بيهو. مديرك في الشغل احبطو لكن بصورة فيها حرفنة شوية.. عشان ما تترفت.. تمشي تقعد جنب ست الشاي.. تحبطها برضو. تطلب شاي تجيبو ليك.. أول جغمة تغمض عيونك وتكشر وشيك وتبصق في الواطا.. شايك زي الزفت.. وتطلب قهوة برضو “القهوة دي من طين عاملاها؟”.. وتعاين للكانون “بعدين دا كانون شنو دا، المكعوج دا.؟”. لكن احتمال فجعة تلقى الكانون في نص راسك.. عندها تيقن انك قد وصلت قمة الإحباط للآخرين.. فلا تحزن واعلم أن القمم دائما مستهدفة!!