عاجننك.. و.. خابزنك

الحوار الوطني:-
واقفين تلاتهم في موقف مواصلات الكلاكلة.. قال أحدهم للبقية.. كدي ارجوني هنا النمشي أسعل لكم سيد الحافلة الواقفة ومقبلة لا شرق دي.. ماشة وين؟
مشى ووصل شلق عاين للسواق من شباك السواق سعل سواق الحافلة “يا جنا ما ماشين الحاج يوسف؟”
رد السواق وعلى وجهه نصف ابتسامة..
“لا.. الكلاكلة”
“يعني ما ماشين الحاج يوسف؟”
“لا لا.. الكلاكلة”
رجع لاخوانو سعلوهو “قال لك شنو؟”… قال لي ما ماشين الحاج يوسف
نط التاني قال لو “آزول ات زول مطرطش ساكت كدي النمشي اسعلو ليكم أنا..”
مشى ووقف في نفس مكان الأول وشلق وعاين للسواق وسعلو:-
” قلت لك.. ما ماشين الحاج يوسف؟”
رد السواق وقد بدت نصف الابتسامة في الخفوت
“لا.. الكلاكلة”
غزا السائل كوعو ثم أعاد السؤال:-
” يعني انتو ما بتمشو الحاج يوسف؟”
رد السواق من غير ما ينظر إليه.. ومتشاغلا بمسح الدريكسون بقطعة قماش في يدو
“لا.. لا.. لا”
رجع قال لهم “ابدا قال ما ماشي الحاج يوسف.. ماشي الكلالكة”
نط التالت وقالهم “انتو شن عرفكم بالنضم النمشي اسعلو انا دا”.. أيدوهو، واتفقو انو زول منضمة.. وكان ما حظو كعب في القراية كان حسي بقى أكبر محامي في البلد.. وعليك أمان الله يمرق قاتل الرقبة من قضيتو….
وقف جنب شباك السواق.. مقّدم كراع.. ومأخر كراع وقال ليهو بثقة:-
” “اسمع…ما ماشين الحاج يوسف؟
“الكلاكلة.. ماشين الكلاكلة”
“نان عربيتكم دي.. مقبلة كدي علي الحاج يوسف لي شنو؟”
“قلت ليك ماشين الكلاكلة”
؟ “حسي يعني وقفتكم دي.. أكنكم ما ماشين الحاج يوسف”
“لا. ماشين الكلاااااااااكلة الكلااااااااااااكلة يا بشر”
“…. يعني حسي ما ماشين الحاج يوسف؟”
نفد صبر السواق.. جرا في السائل نور طويل.. وبي زهج.. وقبض الدريكسون شديد بايديهو الإتنين… وقال وهو مقبل غادي
“يا حاج … ماشين.. القياااااااااااااااامة”
رد عليه الحاج وكأنه وجدت ضالته:-
” اهاااااااااااا.. سمح الحاج يوسف ما فوق دربكم؟”
………….
عزيزي الراكب:-
إذا ركبت المواصلات وخصوصا الحافلات.. إياك وكرسي النص.. ح تشتغل مساعد كمساري بدون راتب.. وح تلقي نفسك تقوم وتقعد، كما البستم يفعل فعلته في مكنة العربية الراكبها…
عليك أن تنصر السواق ظالما أو مظلوما.. لو بتاع الحركة وقفو عشان عندو مخالفة.. تقف علي حيلك.. وتنبري مدافعا عنه حتى لو المخالفة تراها ديك.. وتطلِع بتاع الحركة انو بتاع زبالات..
ان تستمع إلى الغنية البيشغلوها ليك فوق عينك.. وتبدي طربا.. واستمتاع بها حتى لو كانت احدث الأغاني علي صوت احدى مطربات الدلوكة:-
عاجننك.. وخابزنك..
وجوه الفرن حاشرنك..
اسمر لونك برضو حارقنك…
وابداءا لتفاعلك مع الغنية تقيف علي حيلك وتكورك:- ” ينصر دِينك يا شيخة..ايوا احرقيهو حرقو البلا”!!