سند استلام عروس

بعد أن قنع العريس ورمى طوبة العروس.. قرر أن يرجعها لأهلها.. سالمة كما سلموها ليهو… مطالبا بخسارته المالية في العرس…. جرد المتعلقات.. وجاب ورقة وقلم وبعد أن كتب المتعلقات خلى مكان بالتوقيع بالاستلام باسم والد العروس….. وكان كالآتي :

عدد واحد عروس عمرها في الشهادة خمسة وعشرين سنة (بالرغم من سنيناتها تدل على أن عمرها الحقيقي خمسة وتلاتين سنة) والعروس كاملة الأعضاء

راس مدردم فيهو آثار فلقة كبيرة قديمة في نصو… يحتوي على تلتمائة غرام شعر حقها هي… وتلاتة كيلو شعر جايباهو وملصقاهو من برا….

جبهة ناطة لي برا… اتنين حاجب مقرونات مع بعض بقلم حواجب… وبعد الغسيل اتضح ان الحواجب زاتها مافي…. ولكن توجد بعض الاثار لحواجب قديمة كانت هنا….

اتنين عين…. نصف قطر العين الواحدة.. تساوي نصف قطر قد في جلد ماعز… أربعة أجواز رموش صناعية….. اتنين عدسات لاصقة لونها بمبية العدسة اليمين مغبشة… اتنين جُضُم.. كل جُضُم ارتفاعو عشرة سنتم من سطح الارض…. كل جضم مبقّع بي بُقع بُقع بُقع… من استعمال كريمات التفتيح…. خشم واحد مقلوب… وإن بدت آثار لخشم قديم كان جنبو… الخشم مغطى باتنين شلوفة تتميز الشلوفة العليا بأنها أكبر من التحتانية… مما يجعله يبين كأنه مقلوب…. أسنان مكتملة… لكن عندها نابين مخلفات.. كل ناب راكب فوقو ناب إسبير… أربعة فلجات في الأسنان التحتانية… واحد لسان عريض مشقوق في النص… لحدي نهايتو القدامية مما يبين كأنه ذو الفقار.. سيف علي بن أبي طالب… حنك مافي.. ومستعد أحلف مصحف أني استلمت العروس بدون حنك…. شوفو الحنك وين؟ يمكن نسوهو في الكوفير… اتنين يد.. الكف الواحدة مساحتها تلاتين بوصة مربعة…. اتنين كراع مكعوجة…. عدد اتنين كفرات اصطناعية بنشرت في يوم الزفة والمعازيم شهود على ذلك البنشر العظيم، لما جات العروس داخلة وأنا قايدها من أيدها فطرشقت الكفرات فاترتعت ووقعت على قفاي وفي شُفع صرخو ونسوان قامن جاريات ورجال كبّروا وشريط الفيدو يوثق لتلك اللحظة التاريخية….عدد اتنين كراع شمال….. الاتنين شمال قد تكون بُدلت في الساونا.. امشو كوسو لي عروس في نفس اليوم تكون رجعت بي كراعين يمين….. الايدين والكرعين مجلبطات بي حنة… وبها بعض الرسومات راسمن ليها الزول القاعد يكتب في الحافلات والهايسات والركشات… كاتب في الليلة ديك (وراسم ديك في نص الكراع).. ديك واقف ويعوعي… عدد واحد فستان زفاف بي ضنب… ضنبو عشرة متر والفستان تلاتة أمتار… تلاتة أجواز نعلات… عدد واحد سفنجة خدرا….

اسم و توقيع العريس…………………… اسم وتوقيع أبو العروس

اعتماد المأذون