شعب الله الفسفوري

يقول علماء النفس وعلماء الفراسة.. إن لعادات الأكل وما يميل الإنسان إلى أكله.. والعناصر الفي الأكل دا ليها تأثير على سلوكو.. نجد مثلا الرجل الكالسيومي.. بحب الحاجات الفيها كالسيوم.. يعني تلقى الراجل الكالسيومي يحب اللبن ومشتاقتو.. يلغف الزبادي باستمتاع.. يحترم بتاعين اللبن وحميرهم.. يحب الترمس جدا.. يدافع عن بتاعين الترمس لو شاف كشة كشت بتاع ترمس يتصدى ليها ويصفهم بانهم حقارين ما لقو غير بتاع الترمس المسكين دا؟ ويكونو كاشين معاهو بتاعين تسالي وبتاعين اورنيش بس انتباهو كلو في بتاع الترمس دا.. من صفات الرجل الكالسيومي انو قوي البنية.. اطرافو كبيرة .. يعني ممكن يلبس نعلات مقاس سبعة واربعين.. راسو مدردم وقوي.. صوتو أجش.. يدافرك في المواصلات.. يعفصك في كراعك ما يعتذر يعاين ليك ويقول ليك” عفصتك؟” انت مسيكين تضطر تعتذر ليهو وتقول ليهو” معليش.. مافي مشكلة”.. يحب تربية الشنب.. ياكل ويمشي يغسل ايدهو في حوض الماسورة لو فيو مراية.. يدشا بطريقة تجربة الساوند سيستم في الحفلات”باااااااااااع” ويعاين لي نفسو ويمسح شنبو، ويديهو جرة جرتين ويجي قادل عليك وهو يمسح في ايديهو من المرفقين الي المنكبين.. في المشي بيمشي وفارد ايديهو.. وبعد كل خطوتين ينقز بلا سبب.. بصورة منغمة مموسقة.. يحب الرياضة العنيفة.. تلقاهو يتفرج في المصارعة في التلفزيون ويقعد يعضعض في شلوفتو ويدافر بكرعيهو.. وايديهو.. وكل مرة يصيح “ايوا يا اخي.. اخنقو.. فطسو.. ود الغلــ (دعوها سليمة)”.. في النوم ينوم علي قفاهو.. ويكرج سنونو “كرررر.. كررررر.. كرررر”.. لو كنت زول ما بتعرفو وقلبك ثابت.. تقول الزول دا، حسي يقوم ياكلني!!
أما المرأة الفسفورية.. هي البتحب الاكل الفيهو فسفور.. زي الأسماك. التونا الساردين.. وصفار البيض..
صفاتها الجسدية.. راسها كبير ومطاول.. دقيقة الأطراف.. يعني الحنانة لو حريفة في خمسة دقايق تقضاها تب!..
حنونة.. ودودة.. ولاّدة “الحول بزول”.. انطوائية.. أن جا ضيوف البيت تتفسفر وتجري تتحشر في أوضة وتقعد براها.. ما بتحب اللمة ان ناس البيت ماشين حفلة او عرس تقول لهم “بري فتراااااااااانة وحات الله” في المناسبات تتفسفر وتلقاها قاعدة في ركين وخاته ايدها فوق جضمها وتبحلق في عويناتها.. ومتمحنة وترعي في غنم ابليس.. أن نسوان الحلة ماشات بكا بكرعيهن يمشن قدامها اتنين اتنين وتلاتة تلاتة وهي وراهن ماشة براااااها..
زوجة هادئة ومطيعة.. خشمها وعندها.. الكلمة وغتايتها.. راجلها ينضم ويهرج معاها لمن يفتر ما تشتغل بيهو.. لما يفتر خلااااص من الهرجة ويرقد تقيف عن راسو وتقول ليهو”كدي قوم، ننفض لك ملايتك دي”!
ما بتاعة مشاكل ان مرا شاكلتها.. المرا تهرج وتكورك”يا البومة.. يا الدلاهة.. يا المبشتنة” الشتيمة دي كلها وهي ساكتة ان خلاص زهجت و نضمت ترد عليها وتقول لها “والله اياهو”.. . وتدخل بيتها..!!
لانها فسفورية وبتحب الحاجات الفيها فسفور.. راجلها آخر الشهر يلقى حسابو في الدكان سبعمائة جنيه فيهن خمسمائة جنيه ساردين.. يقعد ينقنق “خمسمية جنيه ساردين، اكلتو المرا دي؟.. يا اخوانا.. أنا معرس لي كديسة؟”!