قراءة متأنية في غنية هابطة

الفي ريدو فرط دقس..
يجي غيرو يعمل مقص
المقطعين ديل من قصيدة طويلة عريضة.. تعبر عن استمرارية الحياة ووجود اسبيرات وقطع غيار الحبايب.. يعني لو فرط الحبيب في حبيبو.. الدنيا ما ح تقيف عندو.. ح يجي غيرو.. وهي تدل على توفر الاسبيرات.. في كل مكان ولله الحمد.. والمسألة ما ح تعمل أي أزمة.. والخسران هو المفرِّط الداقس.. والموسيقى الشعرية في هذا المقطع واضحة من غير ازعاج.. وخصوصا كلمة فرط.. !!!
كاتمة كتمة مافي نفس
ناس أمدر شطة بس
نجد في هذه الملحمة الرائعة.. العلاقة القوية بين الكتمة والشطة.. وهي علاقة وثيقة ولصيقة.. قد أبدع الشاعر في ربطها .. والإشارة إليها .. وبنظرة تاريخية للشطة وتحالفاتها.. نجد أنها تحالفت مع القونقليز في فترة مبكرة جدا وبدأ التحالف من من سوق الملجة أمدرمان.. . فكنت ترى الشطة والقونقليز في عناق دائم.. وأيضا نذكر تحالف الشطة مع التبش.. وأخيرا بدأت الشطة تتحالف مع المنقة ومن أمدرمان كانت البداية.. . بعد أن كانت كل واحدة تعبر عن نفسها منفردة “شطة بس.. ومنقة مص”.. وهنا نرجع سبب الكتمة إلى وجود الشطة .. وربنا يهوّن كل أمر قاسٍ.. وعلى مدى مسيرة الشعر العربي.. أو النثر العربي.. لم تذكر الشطة بخير.. إلا عندنا وهي محمدة.. وإضافة حقيقية للأدب العربي.. وانصاف للشطة من الاضطهاد العروبي!!
البي يغنو ديل كشا مشا
ديل بغنو دايرين عشا
أغنية تحكي عن أزمة الغنية السودانية.. وإن بعض المطربين بيغنو عشان يتعشو بس ويشيلو أهلهم.. لا أرى في ذلك عيبا.. كان اساطين الغنا العربي بيغنو بالعشيات بس.. زرياب.. معبد.. الموصلي.. كانو يجو يتعشو عند الخليفة وبعد العشا يغنو.. وباقي العشا يلملموهو في قفة ويمشو.. على وليداتهم.. لا أرى في تناول وجبة عشا قصاد تلاتة غنيات عيبا كبيرا.. بس المهم يكون مطرب.. سمعته يغني للكاشف.. .. بعد أن اتعشى .. غنى غنية الكاشف “رحلة في طيارة” البيقول مطلعها:-
يا حبيبي.. قلبي حاب
رحلة بين طيات السحاب
.. فتمنيت صادقا أن تقع الطيارة بيهو وبي حبيبو.. ويا ريت تكون طيارة بدون طيار.. عشان جهاز الكمبيوتر بتاعها يتلخبط .. وتقع في نص المحيط الأطلسي.. ومن هنا أهيب بهيئة الطيران المدني أن تمنع أي زول اشتر يغني الغنية دي.. نحن ما عندنا طيارات فايقة للبشتنة دي.. كما أناشد منظمة الطيران الدولية.. بأن تقوم بواجبها.. وأطلب من حلف الناتو .. أن يقبض اي طيارة فيها الفنان دا.. ويسقطها.. الغريبة بعد أن انتهى هذا المطرب من بشتنة الغنية دي غنى غنية اللززان:-
وليه انت ما واقعه ليك رايحه بس منك
لو وقعت يوم من فوق برضو نحنا لازنك
من سياق الغنية دي.. يتضح لنا مما لايدع مجال للشك.. أن الفنان دا دردق حبيبو يركب معاهو الطيارة في غنية الكاشف.. عشان يلزو من فوق.. تباً له!!!