قدر الكتابة

* معاناة القلم تبراك.. عذاب الكلمة تحيا براك
تقطر في المحابر دم.. وتكتب بالدموع والهم.. تباريح ذكرى مااا بترحم.. وتكوس الناس عشان تقراك.
منو القال ليك تكون كاتب؟
وتفتح للحزن محراب وتسكن فيهو زي راهب؟
وتحلم بالجمال والخير.. ويطلع ليك حلم كاذب
ولازم فكرك يبقى جميل.. وحرفك لا محال جاذب
حروفك تبقى ليكا ملاذ.. وتكتب ديمة بي إحساس.. معانى كبيرة بي إيجاز.. بلاغة وفيها بعض مجاز.. ومحال ما بترضي كل الناس..
فيا مسكون بحب البوح.. وحبرك في سماكا يفوح.. أكيد حرف الفؤاد مجروح.. وبكتب خارج المسموح.. وسرك فى الغرام مفضوح.. وحالك للأنام مشروح.. تجيك أفكار وفجأة تروح.. تزغرد بالفرح مرات.. ومرات تانية تبدا تنوح.. ومنو القال ليك تكون كاتب؟ وعمرك في الكتابة يروح؟
وجع حرفك.. وجع قلبك.. أنين وطنك.. وطول دربك.. سواد حظك.. هموم شعبك.. سهر ليلك.. قصص حبك.. نحول جسمك.. هيام لبك.. كتاب مفتوح..
بتقررا الدنيا يوماااتي.. ولي عيون الجميع واصل.. صعب ترسم مدار فاصل.. يحدد بين مهام قلمك.. ويبعد عن مدار ألمك.. محال يصبح هناك حياد.. ففكرك كلو ببقى مداد.. وبينك بين نصوصو وداد.. شعورك لا نقص لا زاد.. وحرفك لحظة الميلاد.. تجاهد فى المعانى جهاد.. وترسم لوحة للحاضر.. وواقع عهدك الجائر.. وتكتب عن عشم باكر.. عن المستقبل الزاهر.. وأحلام الفتى الطائر..
* ومنو القال ليك تكون كاتب؟
.. شعورك كلو يبقى مشاع.. وحقك فى المحابر ضاع.. تنوم وتقوم على الأوجاع.. ومحسوب فى الأنام صعلوك.. ومحسوب برضو سقط متاع.؟
أيااااقدر الكتابة سلام.. وداعا”يا شذى الأنسام.. .علينا الفرحة نحنا حرام.. نفتش عنوة للإلهام.. ونرحل فى دجى الأوهام.. مع الأشواق.. مع الآلام.. ولا نملك سوى الأفكار وبس كمين حرف وأقلام.. وفى سوق الأمل والريد
نبيع بعض الأماني كلام..!!
وكان لااازم تكون كاتب.. معذب تضحياتو جسام؟
وكان لازم تكون كاتب.. مهمش بس حروفو عظام؟
وكان لازم تكون كاتب.. عشان تتحقق الأحلام؟
كان.. لاااازم؟!
تلويح:
بعض منك لا يلقاك إلا في المداد!!