غايتو.. مخيّر الله
اتفق زوجان أمريكيان على الطلاق.. مش لانهم ما عاوزين بعض.. لا عشان حسو انو الحياة بقت رتيبة.. يمرقو يمشو الشغل يجو راجعين.. كل واحد يدخل التكل ويقعد يصوط في أكلو.. يجو كل زول ينجدع فوق كرسي ويقهو في التلفزيون.. شوية كدي يشهق واحد فيهم ويدخل يتخمد ينوم بعد ربع ساعة التاني برضو نفس الشهقة ونفس الفترة الزمنية بتاعة الشهقة القبالها.. ويكشت يدخل ينوم.. يصحو الصباح يلقو نفسهم بيكررو في نفس البرنامج.. قررو بعد مداولات.. وبدل ما يسيبو بعض وكل واحد فيهم يضرب لو جيهة.. وجناً تعرفو أخير من جناً ما بتعرفو.. قررو يطالقو.. بغرض تحريك الركود في حياتهم وبحثا عن الإثارة على أن يبدو يحبو بعض من أول عشان يعيشو لحظات الحب والوله والفراق والشوق بكل تفاصيلها.. ويعرسو تاني.. ويعيشو لحظات الزواج ومتعتها.. أول شي يتلاقو صدفة.. وكل واحد يعاين للتاني وبدهشة يقول الله يا أخي دي شرط للأرض.. وتاني يتلاقو صدفة برضو.. ويستلطفو بعض.. ويواعدو بعض.. ويتقابلو.. وينضمو في الحب.. ويساهرو الليالي.. ويقعدو يعدو في النجوم.. وبعد فترة يقررو يتزوجو تاني.. ويمشو الكنسية ويدعو الأهل والمعارف والأصدقاء ويجو ويعرسو.. ويرجعو بيت جديد.. ويبدو الشوط التاني من الزواج.. ويكون زواج ميمون.. الفكرة جميلة وفيها تغير وإثارة.. خطورتها ممكن واحد فيهم يزوغ فعلا. ويقول يا رباً فكاني منك.. ويخلي التاني لافي صينية ويشرب ما يروى.. والخواجات ما عندهم اجاويد ولا ناس كبار يجيبو الزايغ يقعدوهو ويدوهو راسو.. البي يزوغو منو ياكل نارو..
طيب: النحدسكم
نصيحة لوجه الله.. عزيزتي الزوجة أووووووووعك تتمقلبي يجيكي لابس تي شيرت وداقي سيستم يقول ليكي كدا ونسوي زي الأمريكان ديل. ونبدأ من اللول من أيام الجامعة.. والله تاني لي يوم القيامة ما تلمي فيهو.. أول ما تتفكي منو وتبدو من الأول وتصلو ميس العرس.. يقول ليكي كدي اصبري لحدي ما اتخرج.. واشتغل.. واعمل بيت وعربية.. تقولي لي ليهو “أها نان الوليدات؟ أسوي عليهم كيفن؟” يقول لك بزهد شديد في وليداتو “الوليدات كدي حسي خليهم معاكي لمن نعرس تاني”.. المصيبة وقت تبقو علي العرس التاني.. يجيكي يطقطق في أصابعيهو ويقول لك والله الوالدة ما رضيانة ورضا الوالدين دا أنا ما بلعب فيهو.. وتكون الوالدة ماتت ليها عشرة سنين.. ويحاول يطمنك ويطمم بطنك بانو العرس دا قسمة ونصيب!!
وعزيزي الزوج.. أووووعك برضو تفكر كدي.. تكون زمان عرستها بمليون بس وشايفو كتير حسي مية مليون في العرسة التانية ما يحوشنك.. تبقى في شيلة.. وحفلات.. وكوافير.. والمرة دي.. لما تجي سايقها من الكوفير للصالة.. شفعك يتشعبطو في فستانها. وبعضهم في بدلتك.. وممكن تكون شايلة شافع في صفحتها وداخلة معاك.. ويجرو الشفع يقعدو في كراسي الكوشة قبالكم ويخلوكم مشمعين!
نحن شفتو كل زول يمسك قوي.. البيمسك ما يطلُق.. والبي يطلُق ما يندم!!
الباب البجيب الريح- صحيفة اليوم التالي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة