د/ عادل الصادق المكي

منقــة بالشــطة


[JUSTIFY]
منقــة بالشــطة

تعتبر المنقة من فاكهة المناطق الحارة وهي ذات صيت وزيط.. وزيطة وزمبليطة.. وقومة وقعدة. لم تحظى بها فاكهة غيرها إلا الموز في عرفتي.. وهي ذات طعم حلو به لذعة محببة.. فتخطلت في خشمك (الله) الحلاوة مع (آآآآح) اللذعة فتصمت متعة.. وهي من الفواكه التي تترك اثارا على هدومك إذا لم تجد كدها.. ولا يدانيها في ذلك إلا الرمان الذي لا يستطيع أكله بدون آثار إلا زول حريف.. يرقد على بطنو في العنقريب ويمد راسو برا العنقريب وياكل الرمانة.. أي طريقة تانية ح يلقى هدومو كلها اتجربنت بلون الرمان.. خاصة لو كان بياكل فيهو بالدس فهو فضيحة.. والمنقة مشهورة عالميا ومحترمة.. وعندها مكانتها عند الأمم.. قالو قبال كدي واحد من قيادات الإعلام عندنا.. عزم ناس الإعلام العرب ديل جت على حسابنا.. وسكنهم في أحسن فندق على حسابنا برضو.. وأكرمهم وهدى ليهم منقة كلفتنا متين مليون جنيه.. النضم دا زمان وقت الجنية شادي حيلو قبال ما يطرطرش الطرطشة الفيها حسي دي و قبال ما يحقر بيهو الدولار وكل يوم يمسكو ويدق بيهو الدلجة!! وناس بنك السودان يقعدو يحجزو فيهو..
قدر ما فكرت أن أغير سلوكي الغذائي.. وألخبط وأسوط الأكل في بعضو.. ما فكرت أكل المنقة بالشطة.. وبعتقد إنو المنقة والشطة يوم القيامة ما بتلاقو وما في شي بلمهم مع بعض.. يتلاقو حسي في السوق ويذلو ويهينو المنقة ويعمّطوها في الشطة؟.. بعتقد ان المنقة تمثل قمة الرومانسية.. والرقة.. والحلاوة.. والشطة قمة العنف والارهاب والتعذيب.. يقومو ولاد الزمن دا يسوطوهن في بعض وياكلوهن؟ لي شنو؟ سوت بكم شنو المنقة.. تشوشوها وتقطعو ليها قلبها بالشطة؟.. التبش مالو؟ ما من زمان قاعدين ياكلوهو بالشطة.. واصلا التبش جيهتو الشطة.. المصيبة هذه الاكلة التي تعبر تعبيرا صادقا عن ما نمر به من لخبطة مشاعر ولخبطة في كل شي.. واتخلط علينا الصاح بالغلط. لخبطة مشاعر شديدة، دحين العندو احاسيس خايف عليها يبقى فيها عشرة ويضايرها.. لاحظت ان معظم زبائن المنقة المعاقبة بالشطة من الجنس اللطيف الواحدة تكلها وتجرس “اممممممممم وووب علي، شطة السواد” نان مادام هي شطة السواد ما تخليها.. الجابرك علي السواد شنو؟.. !!!!.. زمان كانت الشطة اكلة رجال وفي الرجال رجال يسدوها ويقدوها.. وراجل ما نفسو عاجباهو وشنبو فيهو كيلو ويرك فيهو الصقر، ورويان مريسة.. ما بياكلها.. لكن باقي لي الشطة اتحنكشت في آخر عُمُرها.. حسي النسوان بقن ياكلن الشطة.. ويعمطّن المنقة فيها كية للمنقة.. ولسان حالن يقول عشان غنية البلابل “لون المنقة الشايل المنقة”.. نملا للمنقة دي خشمها شطة.. نابحننا ويغنو المنقة المنقة عاملة فيها سمحة.. وغايظانا سماحتها المن غير كريمات وابرة ومشرحة دي، ونحن النهار والليل مصاقرين المراية ونعافر في وشياتنا.. وبعد دا كلو مافي زول هببو لينا.. وانشاء الله يقيفن علي الخشم براهو!!

[/JUSTIFY]

الباب البجيب الريح- صحيفة اليوم التالي