د/ عادل الصادق المكي

لُــقّاط طــرف


[JUSTIFY]
لُــقّاط طــرف

بعض الشعر الغنائي عندنا.. لو قعدت ليهو واتحكرت واتمعنت فيهو.. تطلع بي نضم يحيرك.. ويربكك.. ويخليك تفكر يا ربي الناس الكتبو النضم دا.. من صحهم.. ويا ربي الناس البيغنو فيهو ديل عارفين المقصود شنو..
تعجبني جدا قصيدة شاعر الحقيبة أبوصلاح:-
أجلى النظر يا صاحِ منظر الإنسان
الطرفه نايم وصاحي صاحي كالنعسان
يعني يا صاحبي تعال نضف نظرك وخليهو ستة علي ستة وفنقل عيونك.. زاجري تعال.. شوف الزول دا.. يحيّر ويمحّن.. لا تعرفو نايم لا تعرفو داير ينوم لا تعرفو صاحي.. مكتل عيونو وقاعد..
أقول وأظن وأن بعض الظن إثم.. إنو زول أبو صلاج دا المكتل عيوننو دا والبيعزم في صاحبو يتفرج فيهو دا زول مسطول.. .
واعتقد لو انتبه ولقاهم واقفين وقاعدين بتفرجو فيهو ح يقول ليهم “شنو يا معلمين؟؟. بتعاينو لي كدي؟.. أول مرة تشوفو زول راكب فيل؟” راكب الفيل هو صاحب المزاج العالي.. الذي.. يبرطع ويسرح ويمرح في خيال واسع مترامي الأطراف..
وعينة من أغاني الشباب اليويمين دي.. . الفنان احمد الصادق سمعت ليهو غنية.. فيها لوم شديد لحبيبتو:-:-
(تبيعني عشان المال زمان قولتي القرش فاني
وانا الصدقتا كلماتك اتاريك كنتي واهمني)
أقول لأحمد وأنا أنصب نفسي أجاويد.. يا أحمد يا ولدي ما تلوم بنية الناس ساكت وتدخلها في ضفورها.. البنية دي ما اتلومت.. صاح هي قالت ليك القرش فاني.. علا انت كمان كان تسعلها بعد يفنى القرش شن الراي؟.. متأكد انها كانت قالت ليك ح اشتت!!.. كنت عرفت رايها وعرفت راسك من كرعيك من بدري.. .
أما الفنان حسين الصادق أخو أحمد.. اللايم البنية الفوق دا
قال حسين وهو يغني ويتحجز:-
“ادقك يا قلبي ولا بصــــــــدري اسجنك
امسكك بإيدي أعصر عليك وأعجنــــــــــك”
أها شفت يا حسين يا ولدي دا التهور الخايفين منو؟؟.. كل شي ولا العجن دا.. خليهو قلبك، بينفعك
برضو داير انبهك لي شي مهم قلت:-
“فيك ياحبيبي جمال رقة وحنان ودلال والباقي تمو خيال”
شفت الخيال دا ما بيتمو حبيبك براهو.. الناس دي كلها قاعدة.. وتعاين واي زول يقطع من راسو.. يقومو يسوو نضم مافيهو.. وتتحمل انت المسعولية
برضو عاين جاي:-
“طولك ده مابنطال فوتا النخيل الطال والباقي تمو خيال”
انت ما سمعت بالمثل “طولو طول النخلة وعقلو عقل السخلة”؟
وبعدين زول زي دا لو داير تقول ليهو كلام سر في اضانو.. علا تشعبط.. وتصلو فوق.. وتجي مزلق بالايدين وتقع تشنقل علي قفاك.. وفي غنية تانية اتخلعت فيها انت من زولك “شفتك يا حبيبي وقربت روحي تطلع.. عشاااااان بتخلع”.. ليك حق تتخلع والله.. لو كان زولك دا ياهو الطولو طول النخلة داك.. انا دا الما بعرفو اتخلعتا.. لو كنت مكانك الشارع البيجيبيهو اخليهو ليهو وامشي بي شارع تاني.. نحن ناقصين خلع في البلد دي؟!

[/JUSTIFY]

الباب البجيب الريح- صحيفة اليوم التالي