النيلين
د/ عادل الصادق المكي

امرأة يكرهها الرجال


[SIZE=5][JUSTIFY][CENTER][B] امرأة يكرهها الرجال [/B][/CENTER]

عنوان كتاب للكاتبة الكويتية الدكتورة/ فوزية الدريع (دكتوراه في علم النفس من أمريكا ديييييييك، الما هنا)..
أوصي أي واحدة بالغة عاقلة تقراهو.. الدكتورة فوزية في مقدمة الكتاب قالت أي زول ما بيحب يشوف عوجتو.. ولو شافها بيطنشها.. عشان كدا قالت أول حاجة الزول يواجه عيوبو ويعترف بها ويحاول يعالجها كان داير يتخارج منها.. وتركيزها على المرأة.. لأنها مرا زيها.. وعارفة قيرا وقعاقيرا.. عشان كدا.. ما المرا تقعد تقرا العيوب.. وتتلفت وتقول اها والراجل عيوبو شنووووو؟.. عشان تتشغل بعيوب الراجل.. والراجل يشتغل بعيوبو.. وتقعد هي تتضاحك وتتونس بيهو.. كل بشر عندو عيوب ضكر أو انتاية.. ومافي زول كامل كدي.. لكن الرك علي العيب ونوعو وحجمو قدر شنو؟.. وهل ممكن يتصلح واللا يقعد كدي مع الزول يدفنوهو معاهو؟.. إن الدكتورة الدريع أسهبت في الكتاب وذكرت بعض عيوب بعض النساء وأصلها السايكولوجي.. في محاولة منها لمعالجة الأمر..
جابت اتناشر صفة في المرا تخلي الراجل يكجنها.. والصفات دي هي:- النقناقة، المسترجلة، العصبية، المنانة، الشكاكة، الطماعة، المبذرة، الكتومة، المغرورة، النكدية، المهملة، المنتقمة.. وشرحت كل حالة ومردودها علي الرجل.. مثلا قالت إن المرا النقاقة قد تكون سبب في مرض زوجها وربما وفاته.. ومن الامراض الممكن تسببها المرا البراية للراجل:- ارتفاع ضغط الدم، مرض السكر، الصداع المستمر، الجلطات، حوادث السير.. لو كان سايق تقعد جنبو وتنق وهو ما يركز ويدقش زول واللا يتلب بالعربية من الكبري ويروحو فيها الاتنين، ويريحو ويرتاحو، لو ماشي بكرعيهو تكون ماشة وراهو تنق فيهو وتنق.. وتنق.. ويكون داير يقطع الشارع تطصو عربية ويقع ويرفس مسيكين ويمرق في الروح.. وهي في نقتها تدنقر فوقو وتعاين ليهو” اها شفتا؟.. عشان ما بتسمع نضمي.. تراكا لحقت امات طه”.. ثم “وووووووووب.. داير تموت قبال اتم نضمي؟”!! أما عن المسترجلة قالت انها بتضعف شخصية الراجل.. وبتخليهو يتكل عليها في كل شي.. يعني لو جا حرامي يكورك لها” مروة.. مروة.. قومي في حرامي” تقوم مروة.. وتشيل عكاز وتمرق.. تجي راجعة.. وتقول ليهو” خبتو ليك خبتة.. ود الكلب.. خليتو راقد يرفس”.. يقول لها وهو متأكد” هيع.. بتخبتيهو انتي يا ام جكمّة”.
.. وعشان النسوان ما يقومن علي الدكتورة وكل واحدة تفتكر الكلام موجه ليها، ويداعنها وينقنق “أول فوزية دي براااااااها شن طعما؟”، برضو ذكرت ميزات سمحة في المرا.. تخلي الراجل يحبها ويتكسر فيها.. هي:- الطيبة، الذكية، الرومانسية، الدمها خفيف، الاقتصادية.. “عكس الممحوقة”، الصبورة، المتسامحة.. البتكتم أسرار البيت، النضيفة المجيهة “ماها الخبوب غبشا”، البتحب الناس.. البتحس بنفسية الراجل، الما بتنضم كتير، الريقها حلو.. ونضمها سمح، البتحب راجلها وتخاف عليهو.. طبعا كل الصفات السمحة دي ما بتتلقي مع بعض.. وبرضها الصفات الكعبة القالتها ما كلها بتكون في مرا واحدة.. دحين انتو لايقوهن مع بعض.. إن اتلقن ستة من هنا وأربعة من هناك.. يمكن الحال ينعدل.. والله يعدل الحال بعد دا الحال!

[/SIZE][/JUSTIFY]

الباب البجيب الريح- صحيفة اليوم التالي

تعليقات فيسبوك
شارك الموضوع :


اترك تعليقا