كوش نيوز .. أخبار السودان بين يديك

قطع ناشف



شارك الموضوع :

[JUSTIFY]

قطع ناشف

بعض الناس البحبو الحبيّبة.. بيعتمدو على الحنك السنين.. فيحنك ثم يحنك إلى أن يصل إلى مبتغاه.. وبعضهم ممكن يكون فعلاً زول جادي.. وما زول ونسة وقرقراب وضحك ساكت.. ويقعد يوري حبيبو إنو ممكن يضحي عشانو.. ويرضيهو.. مهما بلغت التكلفة.. بعد مرات بيكون نضم ونسة ساكت.. ومرات بيكون صُح.. من أجل زوجها قطعت نخرتها:
حدث في عصر معاوية بن أبي سفيان، قالوا رجل يدعى “هدبة بن الخشرم”.. عندو مرا ماساهلة.. وبت رجال وسمحة سماحة شديدة، وكانت تحبه حباً شديداً.. هدبة قتل راجل أختو في مشكلة.. حكمو عليهو بالقصاص.. وهو سايقنو عشان يقطعو راسو.. مرتو مسيكينة تعاين وقعدت تبكي وتولول.. التفت عليها وقال لها: “يا مرا اصبري.. وحلفتك باللذي خلقك ما تقعدي ساكت بعدي بلا عرس.. عرسي.. علا عليكي الله إن دايرة تعرسي بعدي.. أوعك تعرسي راجل مطرطش ساكت.. عرسي راجل كلس.. وفارس.. وما تربطي الحمار مكان الحصان.. قالوا مشت جابت ليها سكين.. وقطعت نخرتها عشان تبقى شينة.. ومافي راجل يفكر يعرسها.. قدر ما حجزوها من نخرتها ما تقطعها وحنسوها إنو النخرة بتنفعا.. أبت كلو كلو.. قطعتها!! وبقت شينة ما بتتقابل.. الأصفهاني في كتابو الأغاني قال: المرا دي بعد سنتين من موت راجلا.. عرست بي نخرتها المقطوعة دي وجابت ولدين.. علا الأصفهاني دا بعد مرات قاعد ينجر من راسو.. يمسك طرف القصة ويديها توم وشمار.. وبعدين قالوا “الاصفهاني”.. الله يحفظنا ويحفظ وليداتنا عندو خصلة زي الزفت، خصلة (السرقة الأدبية).. نضمو الفي كتابو “الأغاني” دا.. كلو ملقطو من هنا ومن هناك.. وبعد مرات بي ضبانتا تلقى القصة.. تشيلها تمشي مثلاً تاريخ الأمم والملوك للطبري.. تلقى الأصفهاني بلا خجلة سااااااارق القصة من الكتاب دا.. والطبري مسكين يكون تعب فيها، غايتو مخيّر الله اللفح دا اتاريهو من زمااااان في..!!
أما الرسام المبدع فان جوخ: قطع إحدى أذنيه وقدمها هدية لأجل حبيبته:
قالوا: كان مشغول يرسم في لوحة حبيبتو.. قعدت تكورك ليهو”يا فان.. فان.. فنوني.. فنوني”..!!
كان غرقان في اللوحة وما سمعها.. زعلت خاصمتو.. سعلها من السبب؟ قالت ليهو: اليوم داك كوركت ليك لمن فترت وانت ما هببتو لي.. زعل وقام جاب سكين.. وقال لها: كنتي واقفة بي وين لما كوركتي لي؟ قالت ليهو: بيمينك.. أمسك يا فان أقطع أضانك اليمين وأديها ليها في ايدها، وقال لها: “أضاناً ما تسمعك انتي تنقطع.. وما تباريني تاني لي هنوك”.. أداها ليها ويغني:
يا مدلل سيب دلالك دا.. هاك أضاني هديتها ليك وردة.. ثم عاش بقية عمرو بأضان واحدة..
قصة الرسام فان جوخ القطع أضانو عشان ما سمعت حبيبتو وهي بتكورك ليهو.. وقصة مرة (هدبة بن الخشرم) القطعت نخرتها حباً في زوجها.. وعشان ما في راجل يعاين ليها ساكت.. وممكن لو كسنا نلقى قصة فيها قطيع شلاليف.. دا كلو عشان نشوف الولاد والبنوت البحبو بـ(الواتصاب) ديل فهمهم شنو؟.. ناس ونسة ساكت ولا ناس قطيّع؟.. شابكين بعض.. بموت فيك بموت فيك..!!

[/JUSTIFY]

الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس