د/ عادل الصادق المكي

اللصقــــــة


[SIZE=5][JUSTIFY][CENTER][B] اللصقــــــة [/B][/CENTER]

بعض الناس ربنا يرميهو ليك فوق دربك.. ويلصق فيك.. تقول تتخارج منو ما تعرف كيفن؟.. يعمل فيها صاحبك.. ممكن يجيك انصاص الليالي فجعة ويقول ليك والله اشتهيتك وداير اتونس معاك.. يقعد يونسك.. وانت تشهّق توريهو انو داير تنوم. وبرضو قاعد وعشان يثبت ليك انو لصقة.. يقول لك (يا زول بتشهّق مالك من المغرب؟.. انت جدادة؟ والله انا مكجّن الزول البينوم من بدري).. ويستمر في ونستو.. وبعدين زي دا ممكن تكون مدسي من زول ودا جاي كايس لي بيتك.. يلاقيهو العامل صاحبك، اللصقة دا.. ويجرو ليك من اضانو ويجيبو ليك عند أهلك.. ويقيف جنبكم وداير يعرف الزول دا دايرك لشنو؟.. ولو فتحتو الموضوع يدخِّل خشمو ويوديك في ستين داهية.. حاج الزين زول لصقة بدرجة ممتاز.. ماشي في الشارع وداير يقطع الزلط تلم فيهو عربية تدقشو تدردقو هناااااك.. العربية سايقاها بنية وكانت بتنضم في الموبايل.. نزلت تتراجف.. لحقت حاج الزين ساقتو المستشفى شيعوهو لقو انو كراعو مكسورة.. رقدوهو.البنية سعلتو أها يا حاج داير شي؟.. قال لها.. ماشة وين انتي؟.. أنا إن ما خيرت وكراعي دي برّت.. ما بفكك.. بقت البنية كل يوم تجيهو.. وتديهو الفيها النصيب.. أها بقى يكتر من طلباتوو يقول لها (قُت لِك.. باكر عليكي الله ان جيتي جيبي لي شوربة جداد.. وبعدين جداد التلاجات ما تسوي لي منو الشوربة، مكجنو.. داير لي جداد حي يفرفر).. قالت ليهو حاضر.. دايرة تمشي كورك لها تاني (قُت لِك.. الجدادة تجيبيها هنا عشان أشوفها.. وتضبحوها لي قدام عيني.. سمح؟.. باقي انتو ناس الزمن دا، ما مضمونين).. يجيبو ليهو الجدادة تكورك ويضبحوها.. وبكرة يقول لها (قُت لِك والله نفسي داخلة في بيتزا.. عليك الله باكر ان جيتي، جيبي لي معاكي سمح؟ قُت لِك البرتكان الجيبتيهو البارح دا كعب.. جايباهو من وين؟.. شيليهو اكلوهو انتو في البيت.. تدقشو الزول وما تجيبو ليهو اللكِل السمح؟.).. على الحال دي أسبوع بي حالو.. خرجوهو من المستشفي البينة جات توصلو لي اهلو.وفي العربية سالتو (أها يا حاج وصف لي بيتكم أوديك).. قال لها وهو متحكر وشايل عصايتو البيمشي بيها (بيتنا ؟.. داير بو شنو؟.. انا لي حسي ما خيِّرتّ وتراها كراعي لي حسي في الجبص.. نمشي بيتكم انتو.. أقعد لمن أخيِّر) اتحيرت البنية ورقدت فوق الدريكسون شوية.. وفوضت امرها لله.. وساقتو بيتهم.. اها بقى قاعد في البيت.. بعد يومين طالب انهم يغيرو الشغالة عشان ما عندها ادب!.. والمرتبة كل يومين يغيروها وكل يومين يقول لها زهجت من قعدة البيت فسحيني.. بعد أسبوع.. قعد مع البنية وقال لها( انتي يا رباب!.. قُت لِك ما عندكم واحدة كبيِّرة شوية ودايرة عرس.. اعقد عليها؟.. وان ما اتلقت الكبيرة دي.. اعقد عليكي انتي دي.. وبعدين عايني جاي!. ما تشوفيني كدي؟.. انا زول فنجري خلاس).
[/SIZE][/JUSTIFY]

الباب البجيب الريح- صحيفة اليوم التالي

تعليقات فيسبوك
شارك الموضوع :


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *