ديوك في حياتنا
أستلف العنوان من البرنامج التلفزيوني الشهير اسماء في حياتنا للأستاذ/ عمر الجزلي.. وعجبني العنوان جدا.. أقول للأستاذ عمر بعد إذنك العنوان أقشر بيهو في الموضوع دا، وارجعو ليك. زي ماهو بعد أشيل ديوكي منو.. في حياتنا ديوك نالت شهرة.. وكان لها الأثر الكبير في تكويننا الثقافي.. من هذه الديوك:
ديك العدة
ديك المسلمية
ديك البطانة
ديك حاجة بهانة
وأخيرا انضم لهذه الكوكبة النيرة من الديوك.. (ديك المكوة)
ديك العدة: هو ذلك الديك.. عندما كانت العدة يرصوها في طربيزة.. قبل الفضية والحافلة.. والحاجات الحديثة البيختو فيها العدة.. وكان الجداد يسرح ويمرح مع الناس في البيت زيو وزي باقي الهوام من معيز وضان وكدايس وكلاب.. كان الديك يطلع ويقيف في تربيزة العدة.. فتحتار ست البيت “لو نهرتو حيتخلع وينطط ويكسر العدة.. ولو خلتو تراهو قاعد يكسر فيها”.. يعني العدة حتتكسر مافي ذلك شك.. وكم من فتى مثل ديك العدة قد استلب هذا السلوك التدميري..
ديك المسلمية: هو ديك متفلهم.. وتغيااااااان ونفسو عاجباهو.. طالع في الحيطة ويبطبط في جناحينو.. ويعوعي بكل ثقة وأنفة وكبرياء.. يعوعي وياخد ليهو قدلة فوق الحيطة ويقيف تاني يعوعي.. في الوقت البصلتو قطعوها وكشنوها.. لأنو اسيادو ناوين يضبحوهو ويلحقوهو الغدا.. وهو مسكين لا يدري ولا يعلم.. وسادر في غيّو وعوعايو.. وكثير منا كديك المسلمية يعوعو وبصلتهم يكشنو فيها..!!
ديك البطانة: هذا الديك.. صاحبو كان مفلس فلس شديد.. يشيلو يوديهو السوق عشان يبيعو.. يربطو في طرف السرج حق الحمار.. فيكون الديك مدلدل.. وتقيف زوجة الرجل وتودع الديك “المدلدل دا.. تاني وين نلقا؟”.. لكن الديك ما يتباع ويجي راجع مع سيدو وهو في نفس دلديلتو.. فيرحبوا به.. وتاني يوم برضو يربطوهو ويدلدلوهو ونفس نشيد الوداع “المدلدل دا”.. وبرضو ما يتباع.. فجرى المثل “زي ديك البطانة.. مشى مدلدل وجا مدلدل”.
ديك حاجة بهانة: كان لحاجة بهانة ديك.. تآمر عليه جيرانها العزابة.. سرقوهو وضبحوهو.. جات بهانة داخلة عندهم وهي كايسة للديك.. لقت ريشو مردوم قدام باب الحمام.. سألتهم “دا ريش ديكي.. ديكي مشى وين؟”.. نطّ واحد منهم وقال ليها: “دخل يستحمّ”.. قالت: “كدي؟ سمح.. أيا أيا.. عارفاهو ديكي أصلو فنجري ونضيف”.. وصنقرت جنب الحمام شايلة بشكير عشان ما يضربو الهوا..
ديك المكوة: أو (المكوة أم ديك).. حمى في اليومين الفاتو.. المكوة القديمة مكوة الفحم.. والفي راسها في تمثال ديك واقف علي حيلو.. هذه المكوة قيل إن سعرها قد فاق الخمسين مليون جنيه.. (خمسين ألفا) وبيشتريها الضهّابة ناس الدهب.. فأخذ القوم يبحترون في المخازن.. ووسط الهتش.. والكرور.. بحثا عن هذه المكوة الثروة.. وحكايات عن فقراء قد فتح الله عليهم بسبب هذه المكوة أم ديك.. يلقى المكوة أم ديك ومن ديك وعيك.. ويغني مع المرحوم زيدان: “في الليلة ديك.. قشّ الفقر مننا”.
الباب البجيب الريح- صحيفة اليوم التالي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة