د/ عادل الصادق المكي

فيسو بوكو حرام


[JUSTIFY]
فيسو بوكو حرام

(بوكو حرام) منظمة نيجيرية في قرية اسمها “كاناما” في ولاية “يوبا” اتأسست المنظمة في عام 2002.. أسسها واحد اسمو محمد يوسف.. يوم اربعطاشر شهر اربعة الفات خطفت ميتين وسبعة وستين طالبة من مدرسة ثانوية في ولاية برنو.. من المدارس الحكومية في نيجيريا.. اعتبرتهن سبايا.. حتبيعن.. في المزاد العلني.. لكن رجعوا قالوا خلاص البيع خليناهو لأنهن دخلن الإسلام.. ما عارف هن مسلمات وعملو ليهن “أبديت” لإسلامن!!!!!..
الجدير بالذكر تقول الاخبار إنهن خطفوهن وتاني يوم كان عندهن امتحان فيزياء.. غايتو ربنا مرقن من الامتحان دا.. والمادة الصعبة دي.
قيل المختطفات نيجيريات ومسلمات.. بوكو حرام جاطت نيجيريا كلها وتفجيرات وخطف.. في 2011 طالبت بإقالة حاكم ماندوكري علي الشريف “الشريف مبسوط مني” بتاع أغاني وأغاني فرع غرب أفريقيا.. لكن شباب بوكو حرام ما مبسوطين منو.. وقالوا ما دايرنو.. خلاص يستقيل ويجينا هنا ويبقى زيتنا في بيتنا.. بدل نبقى في سفر وغربة.. ونضم وشيل حال!!!!
بوكو حرام تعتبر أي تعليم أجنبي وعلوم اجنبية حرام” عدا العربي والدين.. ومبادئ الحساب”.. نظام خلاوي .. وبس
الكيمياء حرام ، الفيزياء حرام ، الاحياء حرام ، الحغرفيا بس يعرفوا القبلة وين، الكمبيوتر حرام وخصوصا النت وتخصيصا الفيسبوك “فيسو بوكو حرام” ، اللغة الإنجليزية والفرنسية واي لغة تانية حرام.. النضم عربي بس، أي حاجة جاية من الغرب وبيقروها في المدارس حرام.. يعني لو شافوا المدارس البيدرسوا فيها بالإنجليزي عندنا هنا، وفي التخريج يجوا الشفع يقيفوا ويتفاصحوا بالإنجليزي ديل بيعتبروهم كفار قريش عديل.. الأناشيد الغير دينية حرام.. يعني نشيد زي “ماما وبابا حبوني.. وأنا حبيتهم بعيوني”.. دا لو سمعوا شفع روضة يرددو فيهو طوالي يفجرو الروضة.. وخاصة حتة “حصاني كبير.. وابقى وزير.. أريح ماما وبابا في السرير”.. هذا النشيد الذي أحمله أنا مسعولية الاعتداء على المال العام عندنا.. وهو تحريض واضح للاعتداء على المال العام وغسيل مخ منظم ومبرمج للشفع.. غير الاعتداء على المال العام فهو ترسيخ لشهوة السلطة في عقول صغارنا.. ويكبروا وكل واحد فيهم داير يبقى وزير وعينو حمرا على الوزارة.. وان ما بقى طوالي يشيل عكازو ويعمل حركة “حصاني كبير لتحرير السودان”.. وإنو الشافع لو ربنا وفقو بعد كبر وبقى وزير يتذكر النشيد دا ويطبقو ويكون ماشي على الوزارة وراكب في عربية الوزارة.. ومنجعص في الكرسي ويقول النشيد في سرو “ماما وبابا حبوني” وممكن يقولو بصوت عالي في البيت من الصباح قبال يطلع علي الوزارة يقيف قدام ماما وبابا وهم مرتاحين في السرير ويمسك طرف البدلة بيدو ويتهوزز “ماما وبابا حبوني”.. هذا النشيد دعوة واضحة للفساد. يعني ابقى وزير.. واخم القريشات واريح ماما وبابا.. وخالو وخالتو، عمو وعمتو.. وحبوبة وجدو ديل جت أريحهم في السرير املا بيتنا جت سراير.. وباقي الشعب ان شاء الله بي نوم الديك فوق الحبل..!!!!

[/JUSTIFY]

الباب البجيب الريح- صحيفة اليوم التالي