د/ عادل الصادق المكي

عقــــارب بـربـر


[JUSTIFY]
عقــــارب بـربـر

في البحث عن علاج للسرطان.. السرطان الجنن الناس.. وبقى شغال فيهم.. أي زول تطول منو.. تسأل يا جماعة الزول دا وين؟.. يردوا عليك: يا زول ها الزول دا مات.. تقول مالو؟.. يقول ليك لَمَّ فيهو سرطان.. أو زول عطس جنبك.. تقول ليهو: يرحمكم الله.. يعاين ليك عين حااااارة ويقول ليك: مستعجل مالك؟؟.. باكر تسمع بيهو قالوا اكتشفوا عندو سرطان في الرئة.. جرب العلماء كل شيء لعلاج السرطان.. من علاج كيمائي.. لعلاج بالأشعة.. لعلاج بالأعشاب.. أخيراً توصل بعض العلماء لعلاج بسم العقرب.. وقالوا السم دا علاج لسرطان المخ.. يمشي السم يدخل المخ ويكوس لخلايا سرطان المخ محل ما تبقى ويقتلها.. وينضف المخ كلو.. جربوها في أمريكا.. وأخدت بعض الشركات زي (شركة ترانسموليكيولر للصناعات) في تصنيع علاج لسرطان المخ.. يدخل في تركيبتو سم العقرب.. سم نوع معين من العقارب.. هي العقارب الصفراء الغليدة.. ودي موجودة في صحاري الشرق الأوسط وخصوصاً في إسرائيل.. وأيضاً شمال السودان.. ومن نعم الله على منطقة نهر النيل ربنا حباها بالأصفرين..(الدهب والعقرب).. تمشي هناك.. تقعد تبحت إن ما لقيت دهب قطع شك تلقى عقرب وكلو رزق.. بينما نحن لم نفق من حمى المكاوي أُم ديك التي وصل سعرها إلى خمسين مليون.. إلى أن جاءتنا البشارات والبشريات من بربر تحدثنا عن ارتفاع سعر العقارب والتي وصلت في متوسطها خمسين جنيهاً للعقرب الواحدة.. والسبب قالوا إنو في رجل أعمال صيني بيشتري العقارب وعندو وكلاء موجودين في المنطقة.. فأصبح أهل بربر وما حولها من مناطق، ربنا جاب ليهم رزقهم تحت عناقريبهم.. وفي لحافاتهم.. وفي نعلاتهم.. كان زمان الزول يقولو ليهو.. ما تحوم في الليل تلم فيك عقرب تقرصك.. حسي بقوا يقول ليهو: مالك راقد؟.. ما تقوم تحوم مع رفقاتك ديل كان تلقى لك عقرب عقربين.. تمرق مصاريف باكر. وتصبح حوامة المغارب وكواسة العقارب وسيلة إنتاجية.. واللا الواحد من الصباح يصحي من النوم وهو راقد في عنقريبو يتقلب يعاين في الواطا.. يلقى العقرب متوسدة بطن النعال.. براحة يخمشها ويمشي يبيعها ويلحق ضل الضحى ويتم نومتو.. وأصبحت الناس تكوس في المخازن القديمة لو ما لقى ليهو مكوة أُم ديك.. قطعاً يلقى ليهو عقرب.. وكلو نعمة وخير من الله.. يعني لو في واحد داير يعرس وحظو كعب في الدهب.. يبحت عشرة سنوات ما لقى شي، عليه بالعقارب، مئة عقرب يخطب براااااااحة.. ألف عقرب يعرسن ليهو ويقضن ليهو شهر العسل.. والمعايش بعد ينتهي شهر العسل.. عقربين كل يوم مصاريف.. إن بقو على الولادة تلاتين عقرب يجيبن ليهو حق السماية.. وبعد شوية ح نسمع بجهاز الكشف عن العقارب وسرقة العقارب.. وشكلة في عقرب.. وتبقى العقارب أحد أعمدة الاقتصاد السوداني.. وبعد سنة تلقى واحد بان عليهو الثراء.. وتسأل يقولو ليك: (شغل عقارب بس)!! لكن برضو الله دا ما كريم.. حتى العقارب الكانت نقمة بقت نعمة..!!

[/JUSTIFY]

الباب البجيب الريح- صحيفة اليوم التالي