كـــلام غــريب

*دولة مافيها ولا شافع.. يقول واااااع . واااااع.. الفاتيكان اصغر دولة في العالم سكانها 1000 زول بس كلهم رهبان مسيحين.. رئيسها البابا.. الرهبان ما بيتزوجو.. وعشان كدا من الله خلقها ما فيها شافع فيها.. يصحا انصاص الليالي وينفقع بكا.. ويطيّر النوم من عيون أهلو وعيون جيرانهم..
*عرّس خمس وعشرين مرة في سنة واحدة.. حلاق يوغسلافي.. يعني في الشهر مرتين.. وفي شهر عرس فيهو تلاتة مرات.. هو كان راجل كان يجي يقول داير يعرِّس عندنا هنا.. لاقي العرس الهوبلي دا، (هوبلي = بي ساكت).. ويعرس ويطلق.. علي كيفو.. عشان من مرة واحدة يطيرلو العرس في راسو..
* هناك في بريطانيا قالو في مرا وراجل عرفو بعض الساعة واحدة ونص بالضهر.. الراجل ختب المرا الساعة تلاتة ونص قبال صلاة العصر بشوية.. وعقد عليها الساعة سبعة بعد المغرب.. وبعد نص ساعة والماذون ما وصل اهلو وملص جلابتو وعمتو.. اتشكلو وطلقها في الساعة الثامنة مساء.. من نفس اليوم.. قبال صلاة العشا.. غايتو الخواجات دل كعبين خلاس.. ما اتلقى زول يدخل اجاويد ويقول لو يا زول اصبر خلي الواطا تصبح؟
* (صوفيا ريا ولف) المانية نضامة ونجاضة.. ونقناقة.. راجلها مات.. مشت لي زول بيرسم الوشم.. قالت لو ترسم لي صورة راجلي في لساني دا.. كية فيّ.. وكية علي لساني السليط دا عشان مات بي سببنا.. وقد كان!.. لكن يعتقد كاتب السطور انو المرا دي مرا غتيتة لمن بي غادي.. رسمت راجلها في لسانا عشان تقعد تنضم والصورة في اللسان.. وناوية تنضم فوقو لحد ما تموت هي.. نظام يعني وين تطير مني؟.. إن انت متا صورتك في خشمي بكان النضم ظااااااااطو.. لو الحنك دا مشى في ناس العالم الأول.. العالم التالت فيهو ناس تفتيحة يا فِرد.. !!!!
*طولها 255 سم.. يعني مترين ونص وخمسة.. المانية ماتت عمرها سبعة سنوات.. شافعة.. اعتبروها أطول امرأة في العالم.. غايتو لما قريت النضم دا شلت هم لي اهلها.. مصاريف..هدوم..عنقاريب.. تمدد كرعيها وكل مرة امها تعتر فيهن وتقع وتندرش.. وكرعين زي ديل قدر ما تلمهن برضو طوال.. وزي دي لو جات هنا وركبت حافلات الثورة بالنص.. تقعد في الكنبة الورا.. وتمدد كرعيها فوق اكتاف السواق.. وناس المرور يعفوهو من ربط الحزام.. أو أحسن حاجة يركبوها في باظات الوالي في الكنبة الورا وتمدد كرعيها في الزقاق الطويل البين الكراسي لحدي ما تصل بكان دايرة.. !!!
*محمد علي كلاي.. كان ملاكم مشهور.. وفاز كتير.. مرة عندو مباراة مع ملاكم تاني.. قالو دردم ايدو وادا خصيمو بُونية.. وهو بعيد منو بسبعة سنتمترات.. سرعة البُونية كانت 900 كلم في الساعة.. كل زول حضر المباراة و شاف البونية النفاثة دي.. ختا ايديهو فوق راسو.. واتحوقل.. علا الخصيم، لانو كان غمران وودوهو المستشفى!!