العلاج بالضحك

نورمان كزنز.. خواجة أمريكي مِرِض، مرض شديد.. واتكسّر ورقد في العنقريب وبقى إن داير يتناول كباية موية مختوتة بعيد منو.. إلا يقعد يزح بالواطا عشان يتناولها.. الدكاترة قالوا ليهو انت عندك تصلب في المفاصل.. يعني مفاصلك يبست.. وتقعد كدي لمن تدخل بيت حقك.. ومافي أي علاج ليك.. مشى أجر ليهو أوضة في فندق.. وقال أنا أقضي باقي أيامي دي أضحك بس.. بقى يجيب في الأفلام المضحكة والمسرحيات المضحكة ويتفرج ويقرقر بي طول حسو.. ستة شهور وهو يقرقر.. يرقد ينوم قشة عينو من النوم يشغل فلم مضحك ويقعد يقرقر.. بعد الستة الشهور دي جا مارق من الأوضة دي….جااااااكي.. خيّر.. ومشى لي دكاترتو وحدسهم بالبقت عليهو الدكاترة احتارو واتمحنو اتخيلو دكاترة أمريكان يتمحنوا لكن عجبني ليهم، خليهم يضوقوا المحنّة دي.. ممحنين الدنيا كلها”.. نورمان كزنز ألف كتاب اسمو”تشريح مرض”.. والكتاب معروف ومشهور.. الزول لما يضحك.. في مادة اسمها الاندروفينات بتتفرز من مخو.. المادة دي تأثيرها زي المورفين والهيروين.. بتهدئ الأعصاب، إضافة إلى أنها تقوي المناعة.. وكل ما ضحكتّ كتير كل ما إتفرزت منها كمية كبيرة وكل ما بقيت هادئ ومناعتك زادت.. وشفيت من أي مرض.. عشان كدي عليكم الله إن زرتوا زول مرضان ونِّسوهوا وضحكوهوا.. ما تنكدو عليهو.. دا إن لقيتوهو صاحي وبيتونس.. أما إن لقيتوهو مختوت في أوضة براهو وقدُر ما فيهو خرم، فيهو خرتوش، تاوقو ليهو بالقزاز وأمرقو برا واجعرو جعيركم..!! يعني زول لو راقد في البيت وعندو حمى ضحكوهو وما تجو تقولو ليهو ناس الموية برا واللا ناس النفايات برا واللا البنزين زادوهو وكيلو اللحم بقى بأربعين ألف.. لأنو الزول دا مسكين ضعيف وأمانة في رقبتكم.. وهو كمان ما يتكل على الحمى ويرقد بها سنة للحول عشان يسمع نضم سمح.. في الحياة العادية الما فيها أي مؤثرات الزول البالغ متوسط ضحكو في اليوم خمسطاشر ضحكة بس.. والشافع بيضحك مئة ضحكة “دا الشافع العندو طبع أما الماعندو طبع داك بيبكي في اليوم متين بكية”.. وكل ما كبر الزول كل ما قلّ ضحكو.. والناس البسيطين بيضحكو أكتر من الناس الفاكنها في روحهم.. عشان كدي تلقاهم مبسوطين وضاربين الدنيا طناش.. بعدين أوعكم زول يضحك ويحاول يخلي ضحكتو سمحة لو كانت شينة واللا يقعد يغتت في خشمو بايدو، يمرقها زي ماهي وخلي الناس يقولو زي ما دايرين يقولو.. إنت الكسبان!!! انشرو ثقافة الضحك.. وحاربو ثقافة النكد.. النكد مو سمح.. ما تحرجو زول لو بيضحك خلوهو يضحك.. وبالطريقة البتريحو.. كوسو للضحك.. الأبو يضحّك وليداتو عشان مناعتهم تزيد وما تجيهم كتكوتة ويقعد يعالج فيهم الراجل يضحّك مرتو، لكن هي كمان ما تستغل فرصة الضحك دا وتقول ليهو دايرة لي توب بمليون جنيه.. واللهِ “ومن قال واللهِ ما خلى شي” والله الفرح حاجة جميلة.!!