الله يـخـدِّرك

الجراح الإسباني البروفيسور”أنجل إسكديرو”.. هو رائد عمليات الجراحة بدون تخدير.. يعني لا مخدر ولا زول يغمتو ليهو خشمو ونخيراتو بنصيبة.. عمل مئات العمليات بدون تخدير.. لو زول عندو عملية يقول ليهو خلاص اللسبوع الجاي العملية.. ويوريهو خطوات.. يكررها المريض عشان يخدّر نفسو.. يجي المريض ويكرر الخطوات ويلقى نفسو اتخدّر.. والدكتور يفتح ويشرط ويصوط.. والمريض صاحي ويتونس مع طاقم العملية.. تنتهي العملية يقوم يمشي بكرعيهو.. على عنبرو ويرقد..
الطريقة دي اسمها التخدير بالتفكير.. أو العلاج بالتفكير.. وهي تعتمد على أن المريض يركز على أي عضو فيهو عشان يعالجو.. يعني إنت لو فكرت إنو انت كويس وما عندك عوجة.. الطريقة دي بتساعدك كتير في إنك تخفف المرض لو ما اتعالج خالص..
التفكير برضو بيأثر في الأشياء الخارجية.. وعملوا تجربة على الموية.. جابو موية في كبايتين.. كباية رددو فيها كلمة: “انا اكرهك”.. وكباية رددو فيها جملة: “أنا أحبك”.. بعد أن شافوا بلمرة المويتين.. لقوا بتاعت الكره ملخبطة وجايطة وشينة.. وبتاعة الحب جميلة ومنتظمة في شكل وردة..
هي طريقة إيحاء لنفسك ولغيرك.. يعني حتى الأكل لو جابوه ليك فسيخ وقلت أنا والله مكجن الفسيخ دا.. الفسيخ حيبادلك نفس الكجنة وحيزعل.. ولما تاكلو بالرغم من كجنتك دي.. بعد شوية حيتلوم فيك وتبقى في وجع بطن..
يقول الدكتور أنجل الشخص الصحيح أو المريض بيتأثر بالكلام البي يقولوهو ليهو..
حتى الزول الفي الإنعاش.. لو وقف جنب راسو الدكاترة وقعدوا ينضمو إنو الزول دا خلاص حيتوكل وما منو فائدة.. حيتأثر بالنضم دا ويموت.. مفروض يدوهو امل حتى لو كان في غيبوبة.. دا غير الناس العاديين الممكن بدون ما يقصد أو يقصد.. لو إنت عيان يقعد يعد ليك الناس الماتو بسبب المرض العندك دا.. من أبونا آدم لي حسي.. وفي النهاية تلقى نفسك خلاص قعدت تتشهّد واستعديت للموت تب..
في جلسة صلح.. أحدهم يشكي من التاني.. وإنو دايرو يموت بأي صورة. قال: “داك الليلة لقاني عندي مراريا.. قعد عند راسي وقال لي يا العوض والله المراريا دي غدااااااارة.. عامنول قتلت البقيع بت عزالدين.. بلعتها وسكتا
قبالها برضو مشيت فحصت.. لقو ضغطي مرتفع.. شكيت ليهو.. قال لي الضغط دا غداااااار.. ديك السنة قتل اللمين ود زين ابوها.. بلعتها وسكت
.. برضو اللسبوع الفات.. مشيت فحصت لقو عندي سكري اربعة صلبان.. برضو حدستو قال لي يا العوض اعمل حساااااابك.. السكري دا غداااااار.. قبال سنتين قتل علوية بت امحمد ود احمودي.. بلعتها وسكتّ..
أها الليلة جاني ولقاني قاعد فوق كرسي في الضل.. قال لي نعل يا العوض ماك حاسي بي شي؟ قلت لو لا لا أحمد الله الصحة بمب وعال العال وما حاسي بأي حاجة.. قال لي: “يا العوض ما تطمن الموت دا غدااااار.. اللمين ود حاج الزين السنة الفاتت قااااعد في ضل زيك كدي.. فوق كرسيهو.. ما عندو أييييييي عووجة.. كنكش مات”