رجل.. وطن

بلد مترامية، حدها كان جدار الشمس.. مجدها كان حديث الدنيا.. لحن الغنية.. معنى الدرس..

وحزنها صار وليد الحاجة.. بيو نتناجى.. خوف من بكرة.. شوق لي أمس..

بلد.. جوانا مافي…وفي..

وأصلاً فيك حنان مخفي..

وزول محتار.. ومن وجدان هواك منفي..

متين يا دنيا لي تصفي..!؟

وتثبتي إنو معنى الآهة في تاريخنا كان منفي..

وممنوع دمعي من الصرف.. ومكتوب لي هناي.. كم حرف.. ووعد اللقيا لي يوفي..

متين ممكن أكون إنسان.. يعيش أيامو في تحنان.. وارفع للطموح سقفي..

زواج الآهة.. من الوحدة.. كان عرفي..

وما في شريعة قبلت إنو نور الحق يكون مطفي..

ألا ياعين.. اغمدي ونومي.. لا تبكيهو لا ترفي..

ويا روحي الملانة أنين.. أريتك تبري من النوح.. ومن جرح الغرام تشفي..

وأريت النوم يزورك يوم.. وفي أحضان وفاك تغفي..

لزومو شنو؟.. تشيلي هواك.. وتجري براك.. وراو تتدردري وتحفي..

وحالك ما بيدوووور وصفي..

وجنك.. ما شبه حرفي..

حروفي قليلة.. فاقدة الحيلة.. لا بتبوح ولا بتكفي..

وأخاف أنا في دروب الريد.. ألاقي أكييييد يوم حتفي..!!

***

وبلد.. حدادي مدادي.. حنيييينة وهسه ليه تجفي..؟

وليه فرحك صبح ممحوق.. ولا بيوصلنا.. لا بيكفي..

وكنتا زمااااان.. بحلف بيك.. وبحلف بي حياة شرفي..

وهسه شرفنا باعوا رخيص.. زوري دبي.. واسألي جدة بتعرفي..

بقينا على لسان الناس.. فضيحة تعر.. أخير قبالها تتوفي..

جراح في الجوف.. وحسرة وخوف.. متين بس منهن تشفي..؟

يعود مجدك.. يدوم سعدك.. تضوقي العز ولي أفراحو تتزفي..

****

ويا بلدي العزيز وكبير.. ويا ريدي الحنين ونبيل..

معاكم بنسى كل الذل.. ويبقى قليبي من أحزانو جت.. معفي..

* تلويح:

إن لي حبيباً كالوطن.. برغم المحن.. لا ينقصه الشموخ..!