كواديك إسفيرية

السحر.. العمل.. الكواديك.. الرتينزات.. الحجاب ابو طبلة.. الحجاب ابو باسوورد.. عرق المحبة.. عرق الكجنة.. الربط.. تحويل الزوج المتمرد إلى نعجة (بااااااع).. وأحيانا باع زاتا لو داير يقولها ياخد إذن من المرا “سهير.. ممكن اقول باع؟”.. تقول ليهو قول بس ما تطول ومرة واحدة.. فيقول باع ولسانه يلهج بالشكر لزوجته الحنون العطوف التي تعطفت عليه بان يحقق امنيته ويقول (باع)!.. السحر موجود.. ونحن بنعترف بيهو.. تمشي للفكي يقول داير اتر من الزول الداير تسحرو وتسجمو وترمدو.. غالبا هدوم بيلبسها او شعرة من راسو.. اسمو واسم امو.. واحيانا يحدث خلط بين السحر والدجل.. وما تعرف انت قدام ساحر اصلي واللا دجال اصلي.. السحر كعلم يتطور كتطور بقية العلوم.. وبرضو الدجل يتطور بتطور الحياة.. والنصب والاحتيال ايضا يتطور.. وتطور وسائلة.. كتبت قبل فترة عن الفكي اسكراتش.. الزول البيتصل برقم معين ويقول لسيد الرقم رقمك دا ادوني ليهو الجماعة” الجن”.. وقالو انت زول مبروك.. إلى آخر المكنة وفي النهاية يطلب منك تحول قروش.. وهكذا.. إلى ان يقضي عليك .. ويجهجهك.. ولما تكتشفو يشوف غيرك.. الحكاية كلها ايماننا الشديد بالسحر والخوف والرهبة منو.. يخلينا جاهزين لأي زول ممكن ينصب علينا.. شاهدت على احدى القنوات الفضائية العربية حوار ومقابلة مع واحد سوداني قال انو هو كان ساحر لكن تاب لله سبحانه وتعالى.. وذكر إنو كان بيتعامل مع متين ستة وتمانين من جن لي شيطان “شفتو قوة قلب الزول دا؟” دي قبيلة كاملة.. نحن الواحد إن لاقاهو بالصدفة شافع شويطين ساكت مسرلنو اهلو الدكان يفك لو الدرب.. قال فيهم الكبار في المقام زي العفاريت والصغار في المقام شواطين ساكت من عامة شعب الجن.. وانه حسي تاب.. لكن هددوهو بان يضروهو .. بس هو ما ساعل فيهم.. ومتحصن منهم.. وفي سؤال عن هل ممكن الزول يسوو ليهو سحر عن طريق وسائل التواصل الحديثة.. وخصوصا النت ومواقع التواصل الاجتماعي زي الواتساب والفيسبوك قال نعم ثم نعم.. وردد نفس الكلام للـ (إم.بي.سي.نت) محذرا بكل جديّة الناس البي يختو صورهم في الفيس بوك الواتصاب والتويتر.. ديل بيعرضو نفسهم لخطورة الكواديك

الفكي دا برضو قال في تقرير لموقع (العربية .نت).. “الرسائل البي يتبادلوها الناس في الواتساب.. ممكن تستغل ضدهم في عمل الكواديك”.. ومن غتاتو لم يوضح كيفية استغلال الحاجات دي!!

أها يا جماعة.. بعد كدي النضم دخل الحوش.. نحن بلا كواديك ما عارفين شي.. دحين العندو واللا العندها صورة تلمها.. وشايف كتير من الناس يتصورو في اوضاع مختلفة.. القاعد وخاتي ايدو فوق جضمو.. واللابس نضارات ومشلق ويعاين للبحر.. والقاعد يضحك بلا غرض.. وعيييييييك.. ويجو يشتكو الخطوبة فرتقت.. والعرس طرشق.. والشغلة كلها شغل كواديك اسفيرية.

تاني الصورة القفا بس.. كل زول يصور قفاهو ويقعد.. إذا كان لابد..

في الواتصآب اعصرو على (الايقونات).. الوشوش المرسومة القاعدة تضحك لمن دموعها تجري وتمد لسانا.. وتحمِّر ديك.. عشان لو في أي محاولة كادوك يتبالا بيها الواطصاب براااااهو!!

وقولو معاي:- الله يكفينا شر الما نقدرا!!