أندونيسية تنجب “سحلية”

عشان الدنيا ما تتلخبط.. وكل مخلوق يعرف هو شنو؟.. وجماعتو منو؟.. ويحافظ على نسلو ربنا خلق حاجة في نواة الخلية اسمها الكرموسومات دي هي المسؤولة عن نقل الصفات الوراثية ابتداءً من نوع المخلوق لحدي أدق التفاصيل فيهو.. والكرموسومات هي عبارة عن اعداد معينة لكل مخلوق في الإنسان عددها 46 في الخلية يعني 23 جوز، في الخلايا الجنسية 23 للحيوان المنوي و23 للبويضة يكونو جنين46 مافي تاني غيرو في الحيوانات نفس العدد عند الفار 40 كروموسوم.. الكلب 78 يعني مافي حيوان من فصيلة ممكن يتكاثر مع حيوان من فصيلة تانية.. “ما عدا حالة الحمار مع المهرة وبجيبو بغل”. لو ما كدي كان الدنيا جاطت.. وتلقى مخلوقات مخلقنة وحايمة.. زول عندو كدارين حماروضنب.. وحمار عندو وشي زول.. وبيلبس نعلات مقاس 37.. وغنماية لابسة حلق.. وماخدة حقن للون والحكاية تبقى هيصة في هيصة كتير من الأحيان اسمع أو اقرا.. انو غنماية ولدت سخل يشبه الزول.. او مرا ولدت كديسة.. وآخر مرة.. امراة اندونيسية تلد “سحلية”..

في خبر في وسائل الإعلام الاندوسية أن “ديبي نوباتونيس” دخلت المستشفى بآلام مخاض وهي حامل في شهرها التامن وفي غرفة الولادة الممرضة قالت شوف عينها السحلية مرقت وفرفرت واتفرتقت واتلفتت جاي وجاي وقامت جارية.. السلطات الإندوسية بدت تحقيق في الحادثة.. وخصوصا انو الجيران قالو المرا أم السحلية دي وأهلها قاعدين يمارسو السحر.. المصيبة السحلية لي حسي ما لقوها قالو المرا دي عندها ولدين وكويسين مافيهم أي شبه للسحالي.. يعني لم يسبق لها ان ولدت سحلية أو ضب أو أي حاجة من الفصيلة دي.

بالله شوفو المرا الممحوقة دي؟ تمانية شهور شايلة بطنها وحايمة وفي النهاية سحلية؟ حسي كان جابت لها سخيلة واللا حِميلة ما كانت نفعتهم هي ووليداتها؟..

زمان في احد نواحي العاصمة سمعنا انو في مرا ولدت جابت قرد.. قالو القرد من تربيزة الولادة للشباك قبضوهو يا الله ويا امين.. عشان يرضع المهم سمعنا بالحادثة ونحن في باكورة صبانا وباكورة شلاقتنا.. قررنا انا وصديقي شاكر ان نقوم بزيارة تفقدية للقرد.. وركبنا بعد ان غسلنا وكوينا جلاليبنا.. ووصلنا.. ودقينا الباب بعد ما وصفوهو لينا.. فتحت الباب مرا غليدة اربعة في تمانية.. سلمنا.. وكنت انا المتحدث حيث انني صاحب الاقتراح ” خالتي ازيك”.. قالت بابتسامة “حبابكم” “انتي خالتي فلانة؟”. وما زالت الابتسامة مرسومة.. ” آي يا وليداتي اياني انا” انشرح صدري لهذا المقابلة الطيبة “خالتي فلانة والله نحن سمعنا انك ولدتي قرد.. ممكن نشوفو ؟” قالت وهي تبتسم “نان مالو يا وليداتي؟؟ زي اخوكم، ادخلو شوفوهو”..

ثم دخلنا..

وما زالت اثار الزيارة في راس صديقي

اما انا فكنت في وزن الريشة.. وقد وصلت الحلة بفارق ساعة من وصول صديقي

استنيتو في طرف الحلة وحذرتو “اوووووووعك تقول، المرا ام القرد دقتنا”