أُمحُمّد.. و.. فاطنة

نحن معشر الضكور نستطيع أن نكتب قصائد الغزل ونطرب لسماعها.. وتحرك في دواخلنا ما تحرك.. لكن إن قعدنا مع من نحب.. يمكن نقول ليهو النضم الحلو دا أول أيام.. وبعد كدي نفتر.. ثم نزهج ثم نبدأ في دوامة اللوم.. انت سويتي وسويتي.. وسويتي.. والخصام.. عشان نحس بمتعة المصالحة نخلق أشكالا من أبسط الأسباب.. ونحارب ونجي بعد يومين نعتذر بطريقة ما نقول فيها كلمة معليش.. تقول لها “يا اخي انتي ظاااااااطك.. بس كان خليتي قوة الراس دي؟”. وخلاص دا الاعتذار.. الرجل كدا “كل الرجال”لا يميل إلى الرومانسية عكس المرا.. التي تميل اليها تحتاجها دائما.. عشان كدي تلقى الرجال في ونستهم الخاصة يصفو النسوان بانهن فارغات ساكت.. والنسوان في ونستهن الخاصة يصفن الرجال “اصلهم ما بي يحننو”.. نحتاج لفهم تركيبة نفسية كل منا.. راجل علي مرا.. ونعرف انو دي خلقة ربنا.. ولازم نتعامل معاها كدي.. “لكن ح نطول”..

شاعرة وأديبة نضمها كلو شعر وادب.. تذوب فيه عشقاً.. تنداح عندما تجلس اليه.. وتتبشتن بشتنة السواد.. جلست أمامه ذات يوم في حراية القايلة.. جرو بنبرين جنب ست شاي.. قالت وهي تذوب وجدا وعشقا وهيام:

هي: عيونك.. عيونك

هو ويدعك فيهن: مالن؟

هي: عيونك فيهن حزن عميق

هو( بفرح شديد):- ما شاء الله عليكي.. عينك نجييييضة.. قايم من مراريا لي يومين ،وهي الدغمست عيوني كدي

هي: بشم فيك ريحة بلدي وتراب بلدي

هو (بدت علي وجهه بوادرغضب):- حتى انتي؟.. من اجي من ميدان جاكسون امي ديمة تقول لي كدي.. تعرفي فيكي ملامح من امي.. ودا الخلاني اعزلك من وسط البنوت ديل جت!!

هي: احملك في فؤادي نجمة.. وتتربع علي رموش عيوني

هو “يعاين لعيونها ويحاول يركز علي الرموش” :- فاطني.. فاطني.. باقي لي اخير تخليني مصنقر فوووق بنبري دا..

هي: لونك الأسمر الأخاذ.. قد صنعته شمش بلادي

هو: هي نان شمش نصاح؟.. “ثم يضع اصبعه الوسطى لي يده اليمين في نص راسو”. من تشرق لمن تغيب فوق صنقوري دا..

هي: بسمتك.. بسمتك ساحرة.عندما تبتسم.تنطلق منك كالسهم وتستقر في فؤادي

هو (يضحك ويعاين ليها وفي عينيه نظرة اصبري):- انتي شفتي شي؟. الله لا ضوقك عضة مني!!

هي: انا غارقة في حبك حتى اذني.. زي ما قال نزار قباني إني أغرق أغرق إني أتنفس تحت الماء..

هو: “وبدأ يعاين ليها عين شك وريبة”: تتنفسي تحت الماء؟.. من حسي بدينا في الكضب؟ اظنو عرسنا دا ما ماشي لي قدام

هي: ليتنا أنا وانت.. في جزيرة نائية.. لوحدنا بعيدا عن البشر.. أنيسنا وجليسنا الحب والعشق والغرام..

هو (بعد أن سرح مسافة وبان عليه الهم والغم):- اهااااااااا.. من حسي نتفق، البيملا الأزيار منووووووو؟.. كل مرة على زول!!
[/JUSTIFY]

الباب البجيب الريح- صحيفة اليوم التالي