عندما يعــوعي الحمــار

كانت عادة أحد المطربين أن يمص ليهو فص ملح قبال أي حفلة.. زمن كان الملح بالفص.. قبال ما يطحن.. ويعرف دربو إلى الطواحين.. كان هذا المطرب الملحي.. يعتقد في أن أكل عيشو.. يعتمد على حلقومو، وهو صادق.. وأن سلامة حلقومو في مص الملح.. جوز من الحبال الصوتية ربنا خلقن في حلق أي زول وأي حيوان من الثديات والطيور.. علا الزرافة.. جوز الحبال الصوتية دا هو البيطلع منو الصوت.. يمرق هواء من الريئتين.. ويهز الحبال دي ويمرق الصوت.. حدة.. و.. غلظة الصوت تعتمد على.. طول ورقة ودقة الحبال الصوتية دي.. كل ما كانت قصيرة ورقيقة كل ما كان الصوت حاد.. ودا بيكون واضح في صوت النساء.. وكل ما كانت طويلة وغليظة بيكون الصوت خشن وقوي وعميق ودا واضح عند الرجال.. طول الحبل الصوتي الواحد عند المرأة لا يتعدى العشرة مليمترات.. وعند الراجل طمنطاشر ملمتر.. نفس الحكاية تنطبق على الحيوانات.. لكن كل حيوان عندو صوتو البيميزو.. يعني لو سمعت ديك بي يعوعي.. ومشيت ح تلقاهو ديك.. أما لو سمعت عوعاي ومشيت لقيت البيعوعي دا حمار.. يكون واحد من الاتنين.. يا إما الحمار دا جنا..او تكون جنيت انت.. أما لو سمعت ههنيق بتاع حمار.. ومشيت لقيت البيهنق دا ديك.. ما عليك إلا تقول بسم الله وتعضي طرف جلابتك في خشمك وتقوم جاري.. لكل حيوان بصمة صوتية مميزة ليهو.. وأي لخبطة في البصمة دي يكون دا نضم تاني.. الصوت آلية من آليات التواصل.. بين المخلوقات.. يعني لو ديك عوعى في طرف الحلة تلقى الديوك كلها الفي الحلة قعدت تعوعي.. أحد الأصدقاء.. شكا لي مر الشكية من الديك حقهم.. قال لي الديك دا نص النهار يكون راقد مغمض وفجأة بدون أي سبب يقوم يعوعي.. ويقعد يتلفت يمين وشمال كأنو ضايعة ليهو حاجة ويرجع يرقد تاني.. وتاني ينط من نومو ويعوعي.. فرغت نفسي يوم كامل لمراقبة الحالة.. جريت عنقريب قريب من قفص الجداد.. ورقدت وفعلا لاحظت هذا السلوك المشين من الديك دا.. سالت صاحبي، لو قريب منهم في مزرعة دواجن.. قال لي ايوا بي ضهر بيتنا بس.. قلت ليهو الجداد الفي المزرعة دا طول الليل النور مولع فيهو؟.. قال لي ايوا.. قلت ليهو يا عمر أخوي الله يخلف عليك.. ديكك دا جننو جداد البطري دا.. الديك يا عمر أخوي بيباري ديوك البطري في العوعاي.. هن النور مولع ويعوعن الليل كلو..وهو يعوعي في الضلمة.. وعوعاي الضلمة اثر في نفسياتو.. واتلخبط عليهو الوقت.. وبقى يسوي في سواتو دي.. قال لي اها شن الراي؟.. قلت ليهو الديك اضبحو.. لأنو ممكن يجنن باقي جدادك.. دا لو ما جننك انت ووليداتك..