أفقر رئيس في العالـــم

حسب تقرير صحيفة (الاندبندانت) أن أغنى عشرة رؤساء في العالم هم بترتيب تنازلي:- ملك تايلاند سلطان بروناي رئيس الإمارات العربية المتحدة ملك السعودية رئيس الوزراء الإيطالي أمير ليخنشتاين أمير قطر”السابق” رئيس الوزراء الباكستاني أمير موناكو ورئيس تشيلي.

أما أفقر رؤساء العالم هم:- بوريت باهور سلوفينيا، فيديريكو فرانكو باراغواي، كزي جينبينغ الصين، ألكسندر لوكاشينكو بيلاروس، براناب كزمار موخرجي الهند، مارين رايكوف نيكولوف بلغاريا، روبير موغابي زيمبابوي – حامد كرزاي أفغانستان، محمود أحمدي نجاد إيران.. وخوسيه موخيكا أوروغواي.

أما الرئيس الأمريكي أوباما فتعتبره الصحيفة من أفقر رؤساء العالم.. غايتو جنس مواسير.. شابكننا أوباما قال وأوباما سوا.. وأوباما فعل وأوباما ترك.. وهو فقيران..”الكتوف اتلاحقت يا فردة” وأوباما نضم في الأمم المتحدة وأوباما عندو خطاب.. جني وجن الزول المفلس ومتفقلص.. بلاد برا دي أتاريها بلاد مطلوقة وهملة ساكت.. علي اليمين زي دا لو جا هنا في برش رمضان دا ومعاهو زول غنيان ما يخلوهو ونسة ساكت يتونس..والله يقدر لو يقول نضم عكس نضم الغنيان.. لو الغنيان قال الأرض مربعة.. وهو علي التعتر ليهو غالطو.. وقال لو الأرض كروية ينطو عليهو” أسكت أسكت.. يدوِّر قنيقينك دا.. إنت شن عرِّفك.؟ شيخنا قال الواطا مربعة”.. ويتخلى عن نظرية كروية الأرض.. وينضمّ إلى النظرية الجديدة تربيع الواطا.. إرضاءا لجماهير الجماجرة الغاضبة يقوم ويقول ليهم “مربعة مربعة.. هي حقتي؟”.. ويدخل في نعلاتو ويشيل أهلو.!!

أما أفقر رؤساء العالم فهو (خوسيه موخيكا) رئيس الأوروغواي.. قالو اتنازل عن جزء كبير من ماهيتو كانو بيدوهو اطناشر ألف دولار في السنة اتنازل عن تسعين في المية منها وقال كفاي ألف ومتين دولار(مرمي الله ما بيترفع).. يعني مية دولار في الشهر نعمة من كريم.. وقالو مستضيف “هو شخصيا ما الدولة” مستضيف متين متشرد في القصر الجمهوري.. غايتو دا يكون مربي لي مرتو المغايص.. صندوق ساكت ما تقدر تدخل فيهو.. ولا ختة عدة في الحلة، وتمسك أوروغواوية أوروغواوية وتشتكي.. “الراجل داير يكتلني بالمغصة يا أخواتي”.. شفت ليهو صورة في النت.. قاعد في مستشفى حكومي يزح مع المرضانين في الصف عشان يدخل على الدكتور.. لكن يا جماعة كدي بالعقل كدي.. الزول دا مضيوف وعندو متين متشرد في القصر.. يعني متين خشم فاتحات دايرات ياكلن كل يوم.. يعني ستمائة رغيفة في اليوم من رغيف الأوروغواي المو خمج.. المية دولار دي بتكفيهم أكل؟.. دا غير أهلو ووليداتو.. دا كلو هين، المتين متشرد الفي القصر الجمهوري ديل.. نعلهم خابرين الحمامات بي وين؟.. غايتو إن بقو ما خابرينها، جنينة القصر ما بتدخل.. وبعدين حسي إن حرشونا وبحبتنا وراهو.. نلقاهو عندو قطعتين تلاتة اللات واطا في العاصمة داسيهن لليوم اللسود.!!