خواطر زول مكـوِّع

كبقية خلق الله.. القاطنين في أرض السودان.. بعد شراب المايات.. أكوع وقدامي كباية شاي.. ويلاويني الريموت والاوي فيهو.. منططا بين القنوات السودانية.. بعيدا عن كيس الدقيق المتكول في الركن الشمالي من الشاشة.. والاسكراتش المختوت في الركن اليمين من الشاشة.. والمكتوب علينا نشوفن طول شهر رمضان”بقينا نشوفن اكتر من وليداتنا “طول ما نحن بنشوف في قنواتنا.. أمر علي كل قناة والقى مجموعة من النضيّمة والغنايين ماسكين مطرب ميت واللا حي.. وينضمو فيهو ما يخلو ليهو صفحة يرقد عليها.. لو كان بقدر ينضم كان قال ليهم الروووب ويوماً أسود، يومي الفتحت خشمي وغنيت.. حكمة ربنا تلقى قناتنين ينضمو في نفس الفنان.. في فنانيين كل رمضان ينضمو فيهم.. ونفس نضم رمضان الفات.. مع مراعاة فارق التوقيت..

أغاني وأغاني.. كانت حلقات النور الجيلاني رائعة.. بروعة النور وأغاني النور.. عاصم البنا كان أحسن من غنا للنور.. يليه عصام محمد نور.. أما البقية فلهم أجر المجتهد.. ولا يجيد أغاني النور إلا النور.. وعين سودا يا النور جات في حنجرتك.. كما سبق وان اصابت نفس العين عبد الوهاب الصادق.. ما زال البرنامج يحتفظ ببريقه رغما عن المحاولات اليائسة من بعض القنوات تقليده وبث النسخة تزامنا مع بث أغاني وأغاني “لكن اقول ليكم بامانة.. عمليتكم ما ظريفة.. وحركتكم جبانة”.. ووحات الله خصما عليكم.. وانتو ما سمعتو المشاهدين بيقولو شنو.. أوعى واحد فيكم بتمغى ويقول حاسدين.. الزول بيحسدوهو علي الشي السمح!!

غنوة في الخاطر قناة قون.. الثنائي (يس وخنساء).. الولاد ديل والله ما هينين.. موهوبين.. وبيعرفو يغنو.. علا برنامج رمضان دا.. كان دون مستوى مقدراتهم.. ويا ريت يا ريت.. لو اتوظفت امكاناتهم ومقدراتهم توظيف صحيح وسليم.. حزنت جدا لحجب برنامج بنات حواء.. إن شاء الله عافية بس؟..

قناة أمدرمان.. بت ملوك النيل.. برنامج نسخة معدلة من برنامج بنات حواء.. يتميز بثنائية المحاورات.. وثنائية المغنيات.. تومات مدني ما زلن في حاجة الي تمارين في الغناء والاداء.. كما وانهن في حوجة ماسة جدا لتمارين رياضية..

غنا السباتة.. محاولة ممتازة من محمد حسن الجقر.. الجقر مرجعية.. لكن قاعد يبخل علينا بالنضم والمعلومات البيتجذب المشاهد.. لو شوية عصر علي النضم اكتر من الغنا. أو على الأقل يديهن مساحة متساوية.. يبقى ما قصر واصلو ما بيقصر.. يقصر الملح في البليلة!!

الأستاذ خالد ساتي.. راجل متمكن ومحاور ممتاز.. علا الأيام دي قايم لو في فتن يا كافي البلا.. يجيب اتنين كل فردة من بلد.. ويفتنن في بعض.. والعوة تقوم.. وإن لقى واحد عصر علي رفيقو يعصر عليهو.. وإن فيهم واحد عدت فيهو حاجة اللت فتنة يذكرو ليها.. ويجوطو تاني.. ونحن نقرقر.. إن شاء الله تقرقر في الجنة يا خالد!!

برنامج سهرة في قناة النيل الأزرق.. عشرة تنفار يقعدو يورجغو، ويجوطو، ويقرقرو، ويورجغو، ويجوطو، ويقرقرو.. ونحن نقعد نساكك في النضم ونفرزو من بعضو.. نفرز القرقراب براهو وبعدين نفرّز النضم براهو والنضم زاتو نقعد نفرّز فيهو.. وفي النهاية نطلع بي قد القفة!! لكن مافي مشكلة أهو ونسة!