كوش نيوز .. أخبار السودان بين يديك

دخلت عليهم بالساحق والماحق



شارك الموضوع :

[JUSTIFY]

دخلت عليهم بالساحق والماحق

المونديال.. مما قالوا حتغني فيهو جينفير لوبيز.. وأنا قلت كأس عالم ما تغني فيهو سميرة دنيا ما عندو طعم.. وما بشوف فيهو ولا مطشي واحد.

وقد بريت بوعدي.. وما قعدت حضرت ولا مباراة.. علا أسمع من الناس.. فلان غلب فلان وعلان مرق ورجع أهلو..

يوم التلاتاء وجعني غلب البرازيل من ألمانيا سبعة واحد.. ودا حقنا أنا وسميرة دنيا.. لو جابوها غنت كانوا شالوا الكأس.. ناطين جايبين جينفير لوبيز.. حسي جنيفير دي كان عندي سماية دحين بجيبها تغني فيها واللا تفتح خشما؟.. البخيلة القحفة، عندها قروش الدنيا والعالمين، قروش تشتري بيها هدوم تنستِر بهن ما بتمرقن؟.. أها تراهم البرازلين دخلت عليهم بالساحق والماحق والبلا المتلاحق واتغلبو سبعة واحد اليخموا ويصروا.

شايف برضو ناس قنواتنا الفضائية في رمضان دا ما في ولا قناة جايبة سميرة.. لكن شاحد الله تبقى عليهم البقت علي البرازيل ويفلسّن يتقفلّن قناة ورا قناة.. ونقعد نحن فضيحة كدي بلا قنوات.

غُلب البرازيل واجعني وجع شديد.. وسبعة؟ سبعة ؟.. عارف المثل بيقول “السترة والفضيحة متباريات”.. علا ماني قايل متباريات لدرجة سبعة قينان.

في مباراة البرازيل وألمانيا.. ولفائدة أصدقائنا ناس البرازيل تمت ترجمة المثل “السترة والفضيحة متباريات” باللغة البرتغالية:

(Jaqueta e escândalo Mtarriet)

رجعت أكوس لأكبر هزائم في كأس العالم.. غايتو أنا بطرا هزيمة الكنغو.. بعد ما كانوا فرحانين والرئيس موبوتو أداهم عربيات وقروش كتار.. لما اتأهلوا لكأس العالم 1972.. كسروا خاطر موبوتو وخاطر أفريقيا كلها واتغلبوا تسعة من يوغسلافيا.. رجعوا الكنغو.. والرئيس قلع عربياتو وشال قروشو.. وسجنهم وسجن اهلهم معاهم..!!!!.. وقالو دفعهم تذاكر الطيارة رايح جايي..!!!!

ألمانيا دي زااااااتا الما تغباكم.. قبال كدي غالبة السعودية تمانية صفر سنة 2002.. وكان ما حجزوها أظنها لي يوم الليلة كانت تغلب فيها..

أما المجر فغلبت السلفادور سنة 1982 غلبتها عشرة صفر.. عشرة قينااااااان نضاااااااف.. وقبال كدي المجر دي زاتها برضو غالبة كوريا الجنوبية تسعة صفر..

أصلو البرازيل ما تشيل هم.. قبال كدي.. امريكا دي المخوفة العالم كلو.. قبال كدي مغلوبة سبعة واحد.. زي البرازيل دي ما تتفلهم ساكت.. وغالباها إيطاليا..!!!

بعدين البرازيل المغلوبة سبعة واحد أول البارح دي.. وليداتهم يجعروا وبنياتهم يتنهفن ويبكن.. قبال كدي غالبة السويد سبعة واحد سنة 74 في ألمانيا..

البرازيليين ديل البي يبكيهم شنو؟؟.. تراها الناس دي كلها اتغلبت.. مافي ولا زول بكا واللا اطرطش.. نحن برانا هنا قاعدين نتغلب لمن نقول بس.. دمعة واحدة بتنزل من زول مافي.. لكن نحن مااااا فارسين” هيع” نبكي؟ يحردن!.. أصلو غُلب ما بيهمنا..!!

غايتو نحمد الله.. وربنا بيريدنا.. ما اتشلاقنا ومشينا كأس العالم.. خايف إن مشينا فُرجة ساكت وما لعبنا نجي مغلوبين اطناشر صفر!!!!.. لكن شوفوا البيبكي منو؟؟؟؟.. نضحك ونتونس سااااااكت: “بالله اتغلبنا؟”.. قرقرقرقر” كدي جيب سفة”!!!!!!

[/JUSTIFY]

الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس