سوداني يتزوج الفاتنة أنجلينا جولي

أي زول فينا.. بينوم ويحلم.. حلم بعد مرات يصحا منو مبسوط.. وحلم يصحا منو زهجان.. وحلم يصحا منو مخلوع.. ويحمد الله انو كان حلم ما كان صح صح.. بعد مرات الأحلام تعبير عن حوجة الجسد “حلم الجيعان عيش”.. ومرات عن الحاجة النفسية والأماني الدايرها.. وممكن يلاقيك زول ويقول ليك “عليك الله ما بتعرف تفسير الاحلام؟” ودايرك تقول ليهو نضم يريحو شوية.. اجتهد ابن سيرين في تفسيرها.. وفرويد ما قصر.. وكتير من علماء النفس اجتهدوا فيها.. وكلو زول يقول نضمو.. أما نحن البنحلم ديل.. بنشيل التفسير البيبسطنا.. والما يبسطنا نقول الزول دا كضاب ساكت.. لكن بينا وبينا نفسنا مرة مرة نقول يمكن نضمو صح ونشيل هم.. يعني المعروف عند أغلب الناس أن الحلم باللحم كعب.. حسي بقى في الحلم واللا صحي صحي اللحم غالي وكعب!! مكونات وعناصر الحلم تعتمد علي مكونات البئية العايش فيها الحالم والزمان.. تدخلت الوسائل الإعلامية الحديثة وصاطت علينا حتى أحلامنا.. يعني زمان قنوعيييين الواحد يحلم انو عرس عشوشة بت سعدية وتكون هي أسمح انتاية عينو وقعت عليها.. حسي عشان الاقمار الصناعية.. والنت.. ممكن واحد قاعد في قرية (شنب البعوضة).. يحلم إنو عرس (هيفاء وهبي).. ويشطح ويحلم بي الممثلة الفاتنة (أنجلينا جولي) وانو اتزوجها ويشوفها ترقص على أنغام دلوكة (قسمة) وغنية عريسنا غلبو الثبات.. وينطط هو فرحان مع الغنية واردلوووب يقع من العنقريب.. ويصحا فجاة من النوم.. ويقوم ينفض نفسو.. ويعاين يلقى مرتو قدامو واقفة.. تمسخ عليهو المرا والوليدات.. وتمسخ عليهو حياتو.. ويصاب باكتئاب وقتي.. يصحا منو لما يعاين لي كريعاتو المشققات ويكون صريح مع نفسو “حسي دحين ديل كريعات زول يعرس أنجلينا جولي؟”.. ويرجع يتصالح مع واقعو “النعمة جيبي الشاي”.. ويعاين للنعمة ثم الي كريعاتو ويوقن تماماً ان” كل فولة وليها كيّال”.. قلت مع تغير معطيات الحياة تتغير الاحلام ورمزيتها..

مثلا تفسير حلم الطيران:-

الطيران في الحلم.. قالو سمح.. لكن ما اظنو

*عزيزتي الزوجة لوحلمتي انك طايرة.. جهزي شنطتك وستفي هدومك..

*عزيزتي الحاسدة لو حلمتي انك طايرة.. ح تطيري من الفرح عشان خطوبة صاحبتك ح تفرتق

*عزيزي مقدم الوظيفة لو حلمت انك طاير.. شوف صاحبك يشوف ليك ركشة تشتغل فيها جوكي.. أو اتعلم الحلاقة..

*عزيزي رئيس النادي الرياضي لو حلمت أنك طاير.. اقنع من الموسم..

*عزيزي الوالد لو حلمت انك في يوم الوقفة وانت في نص السوق ومعاك وليداتك وفجاة طرت منهم.. اعلم ان الاسعار طايرة السما.. وانت تتمنى انك تطير ما تجمّع.. ولو انت طاير في طيرتك دي وضربك صاروخ فاعلم انها دي (نهرة) المرا!!

*عزيزي الطاشم لو حلمت انك طاير.. سوف تتوهط في الطارة وتطير ليك في راسك.. وتطير تاني طيرة حلوف من الجروف..

*عزيزي الوزير لو حلمت انك طاير.. تاكد أن طيارتك قامت.. لملم ورقك وسوق معاك ولدك!!