قوالات

ما قلتا ليك يا حب.. أديني فرصة أخيرة

أعرف حقيقة الشوق.. وأفهم معاني الغيرة

وارسم سماء الريد.. صافية ونجومها منيرة

واكتب خواطر البوح.. وقصص طويلة قصيرة

فيها المعاني تطول.. وفصولها صاخبة مثيرة

وامشي الدروب بالود.. مهما يقولوا طويلة

ما قلتا ليك يا حب.. علمني معنى الحيرة

ولا تاني أكتب لي.. أحزان وقصة مريرة

هل يعني ما بتفهم.. ولا المهمة كبيرة؟!!

ولا الغرام مفروض.. دايماً حكايتو خطيرة؟

كل الفرص يا حب.. ضاعت وصبحت سيرة

لا شفتا فيها نجاح.. لا عرفتا نورها وخيرا

ولا جاني فارس الريد.. بقاني ياخي أميرة

وهسع خلاص يا حب.. أقفل قلوبنا وشيلها

#####

ما قلتا ليك يا زول.. أنا ياخي محتاج ليك

ووصفتا ليك حالي.. وكان عشمي دايماً فيك

وريتك أحزاني.. ورميت حمولي عليك

وكتبتا ليك عمري.. من ساعتو ديك في شيك

وأنا من وريد الحب.. كان قصدي جد أسقيك

لكن أظنو الريد.. يا غالي ما بكفيك

وأنا زول فقير عدمان.. ما عندي شان أهديك

غير بس قلب ولهان.. وكتبتو ليك تمليك

#####

ما قلتا ليك الناس.. ما ليها أي أمان

تضحك أمام عينيك.. ووراك تمدوا لسان

تنسى الجميل الكان.. سويتو مرة زمان

ولا تطرى يوم الحب.. والصدق والتحنان

بس فالحة تتكلم.. وترميكا بالبهتان

ترميك في سجن الظن.. وتكون عليك سجان

#####

ما قلتا ليك البوح.. في بلدي عمرو قصير

لازم تكون حناك.. وتجيد فن التطبيل

وتبيع تلج في السوق.. ألواح بدون تكسير

علشان تعيش مبسوط.. ما تخلي أي ضمير

على قدر ألوانك.. باكر بجيك الخير

وتكون عظيم الشان.. ومقامك يبقى كبير

لكن بموت جواك.. كل معنى سامي جميل

تلويح:

اللهم أكفنا شر القوالات..