أحــــلام المــوزز
موزز جمع موزا.. قيل إنها تطلق على الحسناء الجميلة.. وقيل إنها تطلق على أي أنثى مهما كانت درجة جمالها.. وقيل إنها للأنثى فقط.. بعضهم قال إنه بالإمكان استعمالها للضكور.. كلمة “موزا” أو “موزز” جاءت إلينا من أرض الكنانة.. تلقفناها وبدأنا في استعمالها.. وا سجمها وا رمادها.. كاختها “جكس”.. وكلمة جكس كلمة أمريكية.. تعني سواسيو.. جمع سوسيوة.. أوكتاكيت.. جمع كتكوت.. فجاء المثل الانهزامي المحبط المعبر عن سايكلوجية الإنسان المقهور المهزوم.. والذي يردده مدمنو الشواكيش “كل ما نربي كتكوت.. يكبر يفوت”.. وهو مثل يكرِّه في تربية الكتاكيت وكل أصناف الطيور الداجنة.. ويخلي الزول يفكر يربي جريوات..!!
في ترويج في إحدى القنوات لحفلة في الحبشة سمعت “ود العز والبنيّة” تغنيها فنانة حبشية.. وإخوان فاطنة من أصحاب الشيكات الطايرة “المخندقين” في الحبشة يبشرو.!!
منتظر.. بس تغني لينا “عجبوني أولاد الفرسان.. وما شالونا باللواري”..
غايتو الله كريم.. يرسلو لينا في المطر من الهضبة الإثيوبية تغرقنا عشان يقعدو هم يغنو “ما شالونا باللواري.. وترسو البحر خيرصان” .. ويكسروها بـ”أنهنا فوق إزنا…قبايل ما بتحزنا..) وصررررر رجا”
وفي الختام.. تمسك المايك وتنضم معانا الغناية الإثيوبية الحليوة ونحن مخفجنين ومليانين طين:
(I love sudanese people)
قال النعيم وهو فاتح خشمو يعاين ليها “الكرار أخوي… يا جنا قالت شنو؟”
قالت: بتحب الشعب السوداني…
“الشعب السوداني… جت؟..”
رد عليه وهو في قمة الزهج (آي.. جت يا النعيم..)..
عاين ليها بتمعّن شديد وقال:
“الكرار أخوي.. الشي دي ظانيتا ما عندها قشة مُرة”..
*نبذة عن النعيم الذي سعل الكرار عن الفنانة الإثيوبية:
في الــ20 من عمرو.. امتحن شهادة تلاتة مرات متتاليات.. جاب 56%،57%، 58% على التوالي.. مما جعله يتهم لجنة التصحيح بالتآمر عليو.. ومستقصدنو عديل كدي.!
يأنس في نفسه قيافةً ودشدشةً للجكسِ.. وقد عمقت أمو فيهو هذا الاعتقاد.. فكانت تناديه بالسكاكر “جمع سكر”.. وخصوصا لما يكون راقد.. وهو بين نائم وصاحي في حالة استعداد ذهني للاستجابة للإيحاء.. تعاين ليهو وتقول “الله يشوفا، دي السكاكر”.. فيتمغا فرحاً وغروراً.. ويعاين ليها مغمض عين ومفتح عين ويقول ليها “يُمه.. عليكي الله ما تسحريني… الفطور بي شنو.؟؟”!!
رجع من الخرطوم.. وأول مرة يسمع كلمة “مُوزا” للبت السمحة… حفظها غلط.. صادف مجموعة من بنات الحلة وعاوز يستعرض حصيلته المعرفية في الغزل، قعد يعد فيهن.. “دي معزة.. ودي معزة.. ودي معزة.. وأم طرحة خدرا ديييك معزة.. واللابسة الاسكيرتو اللصفر ديك معزة.. الكتراااااااابة.. غايتو الحلة مليانة كترت “معوووز”
ومن ثم.. فُتح بلاغ أذى جسيم ضد خمسة من “معوز” الحلة..!!
[/SIZE][/JUSTIFY]الباب البجيب الريح- صحيفة اليوم التالي
