براك شايف البلد دي

تحب زوجها حب شديد.. لدرجة الجنون

داير يسافر في مامورية خمسة أيام

وقفت تودع فيهو: “.. خلاص ماشي؟.. وحات الله البيت بلاك يبقى مسييييييييخ” اتشعبطت فيهو وقعدت تبكي وتتنهف وتسلم عليهو في جضومو وتقول: “.. عليك الله اتصل كل يوم.. لا واللا اقول ليك كل ستة ساعات.. واللا اقول ليك كل ساعة.. لا واللا اقول ليك كل نص ساعة.. لا واللا اقول ليك كل دقيقة.. لا واللا اقول ليك ما تسافر.. خليهو السفر دا.. حيسوو ليك شنو؟.. مو الرفت دا؟ اليرفتوك كان رافتنك والاكل والشراب مافي زول غلبنو”

ما سمع نضمها.. مشى المطار.. ودعها يا الله و يا آمين فرتق إيديها من رقبتو وهي متشعبطة فيهو.. وتسلم وتبكي..

في المطار جرت لحقتو.. لقتو ركب الطيارة نطت سور المطار ووقفت قدام الطيارة وقالت ما بتقوم أصلها وحبيبي فيها.. مسكوها ناس البوليص ونزلوا راجلها منها.. حدث هذا في كندا في مطار (هاليفاكس ستانفيلد) الدولي، حيث حواجز أمنية بارتفاع عشرة أقدام، وأسلاك شائكة حول سور المطار..

في الخرتوم:

بعد مساككة سنتين ودفع الوراهو والقدامو.. لقى عقد عمل في الخليج لمدة خمسة سنوات.. يعني حيغيب خمسة سنوات.

حضور المطار الساعة اتنين صباحا

الطيارة مواعيدها الساعة ستة صباحا

من الساعة اطناشر.. المرا ستفت الشنطة.. وقعدت تنبح: “أها يا عبد المنعم أمرق.. أمشي الطيارة دي بي تفوتك.. غايتو يا فطاستن عليك.. أمرق.. حدست سيد اللمجاد؟”

– “آيي قال بيجي الساعة واحدة”

– “الساعة واحدة لي شنو؟.. حسي أفرض اللمجاد دي اتعطلت فوق الدرب؟.. الطيارة تفوتك؟.. أمرق شوف لك أمجاد غيرها”

يمرق يجيب أمجاد تانية.. يشيل الشنيطة ويجرجر كرعيهو.. يركب قدام شايل كيس فوق حِجرو.. الكيس مكتوب عليهو “صندلية العنود” صادف أن اتخرم جنب نقطة النون في كلمة العنود فاصبحت تُقرأ (صندلية العتود). يحتوي الكيس على البظبورطي وجواهو تظاكر الطيارة “ذهاب بدون غياب” ونعلات ملفوفات في جريدة.. وفرشة أسنان.. وبشكير.. وهي واقفة في خشم الباب وشافع في السابعة من عمرو واقف تحت كرعيها يدعك في عويناتو قالت مخاطبة زوجها بحزم شديد: “أها ودعناك لي الله.. أوعك تشيل هم.. وتتطرطش وكل يوم تضرب تلفونات.. كررررو.. كررررو.. كررررو.. قريشات التلفونات دي بينفعننا؟.. أحفضن، براك شايف البلد دي!!.. وأوعك تسويهن كلهن طحينية وتجينا كلك جضموم ومدلدل إيديك إيد ورا وإيد قدام.. براك شايف البلد دي!!.. وحات الله يومين بس جضومك ديل يتماصن!!.. براك شايف البلد دي!!!.. وما تجينا كل إجازة ناطي.. أصبر أحفض القروش.. براك شايف البلد دي!!!.. قروش الإجازة ديل بينفعننا.. براك شايف البلد دي!!!”

اللمجاد اتحركت وهي تنضم وتكورك: “وبعدين المصاريف كل أول شهر ما يتأخرن، براك شايف البلد دي!!!!.. المصاريييييييف.. المصارييييييييف.. المصاريف”..

الشافع.. يعاين للأمجاد ويكورك تزامنا مع كواريك أمو: “أبوي.. أبوي.. أبووووووي جيب لي جلكثي، براك شايف البلد دي”!!!