شقي الحال يقع في القيد

القيد الأول:-

ناس قناة النيل اللزرق يوقفو المذيعة نعمة عثمان

قالو عشان غلطت في برنامج الصباح وقالت لي واحد من المتصلين “رمضان فات بي خيرو وبي شرو”

وحات الله يا ناس قناة النيل اللزرق.. إن باريتو الغلطات الزي دي ما يفضل مذيع ولا مذيعة في القناة..

أنا دا أن اديتوني ضحوية بس.. وكوعتّ قدام قناتكم دي.. اطلع لكم اقل شي عشرين غلطة..

عشرين يوم ومذيعنكم ضكور على أناتي بقرو اسم جريدة “الفلاّح = المزارع” بيقروها “الفلاح من فلاحة وشطارة”.. كل يوم أقول زول يصلحهم.. من مدير القناة لي عند فاعلين الخير البيجو ماشين بجنبكم.. ما لقيتو.. ولا حتى الناس الاتصلو وقال لكم نعمة اتلومت في رمضان!! لي عند سيد الجريدة مسيكين.. ظانيتو ما عندو خبر الناس البشتنو ليهو اسم جريدتو ديل.دا مثال بسيط للأخطاء.. الممكن تكون بسيطة.. أي انسان بي يغلط.. لكن كمان ما كل يوم يضايرو ليهو غلط.. وتاني يوم يغلط تاني..

نعمة مسيكينة بقت عليها “شقي الحال يقع في القيد”.. بس عشان اتلومت في رمضان وماها قاصدة.. وتكون قالت كدي وهي سرحانة في هموم الدنيا.. وتراها سامعة الناس قاعدة تقول “الشي الفلاني فات بي خيرو وبي شرو”.. ودايرة تقول زي باقي الناس!! اللوم راااااااقد والعندو ضهر ما بيدقا على بطنو.. والله جنس نضم بتقال في قناتكم دي وجنس خرمجة ما يعلم بها علا الله.. ما قناتكم براها كل القنوات سجم في رماد.. يجي مذيع أو مذيعة كبيرة تتفرجخ قدامنا وتصوط وتصوط مافي زول بيقول ليها النضم دا اعوج منك.. علا بس حظ البنيّة المسيكينة دي! وعليكم الله يا ناس الحكومة لمو القنوات “الإذاعات المدرسية ” دي في قناة واحدة.. وحات الله شايلاهن!!

القيد التاني:-

ليس دفاعا عن الوزير ولكن دفاعا عن القعونج:-

نضم كتير.. وقدر ما يلاقيك زول يقول ليك اقيف شفت مامون حميدة داير ياكلنا القعو.. وقال فيهو بروتينات.. وسمح.. كل زول شايل طارو ولافي.. مامون والقعونج مامون والقعونج مامون والقعونج.. خلينا الناس الغرقتهم السيول وما عارفين يقعدو وين؟.. وبقينا في القعونجات ومامون حميدة.. أيها المواطنين البطنهم بتطم.. بعيدا عن السياسية ونضم مامون.. نحن أمة قاعدة تاكل أي حاجة.. ما تتفلهمو ساكت.. فينا ناس بياكلو الجقر والفار “نوع من القوارض الغليدة يشبه الفار” يضبحوهو ويعزموك وإن أبيت تاكل يقولو عليك زول متفلهم ومتفلقص.. وفينا ناس بياكلو ابوالقدح.. وفينا ناس بياكلو التماسيح.. أما الجراد داك.. معظمنا بيالكو.. وفينا ناس بياكلو القرنتية.. يقبضوها.. ويضبحوها.. والحلة كلها تجي تتلما فوقها وكلو زول شايل ماعونو عشان يضوقو لحم القرنتية.. دا غير اللحم البياكلوهو لينا الناس بالدس.. كم مرة قبضو حمار مسلوخ.. كم مرة قبضو كلب مضبوح.. اعتقد انها حقارة بالقعونجة أكتر من انو لوم لسيادة الوزير وحقارة غير مبررة.. إلا لأنها مسكينة.. وما بتنضم ومافي زول بيدافع عنها!