أم الحسين اتنفخت

أم الحسين اتنفخت ودايرة تطق.. مافي زول يسعلني ويقول لي النفخها منو؟ السودان.. هذا البلد.. الذي أصبح فيهو كل زول شايل منفاخو وينفخ.. وأصبحنا كلنا نافخ ومنفوخ وبيينا منفاخ.. منا من هو منفوخ زعلا ومغسة.. ومنا من هو منفوخ شبعا.. شبع بي حلال بي حرام ما ضروري المهم يتنفخ.. ومننا من هو منفوخ غرورا.. برضو بالكضب بالصح ما هميّة المهم يكون منفوخ وخلاص.. أصبحنا ننفخ في بعض.. تنفخ فلان وتشكرو.. وهو يتنفخ ويقيف لمبة.. وتاني التفشو ما تتعرف.. أول ما يتنفخ ونفسو تعجبو يقبل عليك انت النفختو.. تزعل انت وتمنعك عزة نفسك إلا أن تتنفخ مغسة.. فتصبح منفوخا.. وهناك النفخة المؤقتة.. ودي للزول البتنفخ حين شكلة.. ويضمن الحجّاز.. وفي محللين سياسين بيجيبوهم ضيوف في القنوات الفضائية.. “الغريبة كل يوم يجيبوهو ويقولو ليك ضيفنا الليلة فلاني الفلاني.. وهو ساكن فيها سُكنة”! ناس القناة بعد ما يضمنو انو اتنازل من حقو في الحلقة ويتقاسموهو ارزقية القناة.. ويجي، وينضم ويتنفخ، ينضم ويتنفخ، ينضم ويتنفخ.. لحدي ما انت يا المتفرج تشيل هم لشاشتك ما يملاها وتطرشق. واللا ما يملاها ويدفق.. وتقعد تلملم فيهو وتدفسو وتحشرو راجع في الشاشة!! في خبر في احدى الصحف انو ناس المعارضة في لندن اجتمعو.. واتنفخو.. وشاكلو بعض.. وضرب بالكراسي.. ونحن بي جاي فاتحين خشومنا راجنهم.. . يجو ويمكن يتلقي عندهم حل للبلد المنفوخة مشاكل دي!! “وأكد شهود عيان أن الاشتباكات اندلعت عقب ملاسنة بين المستشار السياسي بحركة العدل والمساواة محجوب حسين، وممثل الحزب الشيوعي السوداني الذي اتهم حركات دارفور بالعنصرية وممارسة تجاوزات أضرت بقضية المعارضة السودانية – على حسب تعبيره – وصوب ممثل الشيوعي بحسب الشهود انتقادات طالت الصادق المهدى الذي وصفه المتحدث الشيوعي بالانتهازي و(الغواصة)، وأن عملاء للحكومة السودانية بالجبهة الثورية رتبوا التقارب الأخير مع الصادق المهدي لأغراض لصالح النظام على حسب تعبيره”. أها عاينو جنس الخفج دا؟ ما بينفخ؟ هم اصلا مجتمعين لي شنو؟.. عشان يسوو شنو؟ وام الحسين والله فترت من الاجتماعات هنا وهناك وهنووووك وفترت من المبادرات والأجاويد واتفاقيات السلام كل اتنين متقابلين سو اتفاقية.. زهجو فرتقوها.. اتحاربو تاني.. قامت الاجاويد تاني اتفاقية.. وقدر مافي بلد مشو سو اتفاقية باسمها شايلين اتفاقيتهم وحايمين فوق بلاد الناس.. اتفاقية اديس.اتفاقية نيفاشا.. اتفاقية أبوجا.. اتفاقية باريس.. اتفاقية الدوحةاتفاقية كمبالا.. اتفاقية نيروبي.. وعيييييييك خطوط الاتفاقيات اكتر من خطوط الطيران للخطوط الجوية السودانية عليكم الله كدي جربو امريكا اللاتينية (اتفاقية كراكاس) شوفو الاسم دا موسيقي كيف؟ ينفع في الاتفاقيات و يمكن تكون مبروكة ونمرق باتفاقية تحلنا، و”يحلنا الحلا بله”.. أهاا عندي ليكم فهم انتو الحلا بله دا ما تشوفوهو؟! وخلوهو يدخل واسطة بيناتكم.. ام الحسين بعد الصواطة دي ما ليها حق تتنفخ؟.. تتنفخ وتقيف قِربة.. وخايف يصبح صباح وتطرشق عليكم.. وتقعدو تتلفتو!