كوش نيوز .. أخبار السودان بين يديك

كسِـر خاتـِر



شارك الموضوع :

[JUSTIFY]

كسِـر خاتـِر

مافي حاجة بترفع دغتي.. وتجنن كديستي.. غير البت الفي الموبايل دي.. وكل مرة تجي ناطة لي وتقول لي “إن رصيدك غير كاف لإكمال هذه المكالمة”.. أو”إن الرقم الذي طلبته خارج الخدمة”.. أو “الرقم الذي طلبته مشغول الآن الرجاء المحاولة مرة أخرى أو الانتظار”.. لكن أكتر واحدة قاعدة تكسر خاتري بتاعت الرصيدك كِمِل دي.. وكمان بي نهرة.. يا أخي حقو ناس الاتصالات ديل يراعو لظروفنا النفسية.. ويراعو وضعنا العاطفي.. الناس البيتصلو ديل ما كلهم واحد.. حسي أصابعين ايدك ديل واحد (ويشبّح كاتب المقال ايدو الشمال عشان يوريكم الأصابع).. فيهم ناس شبعانين نهيّر ونهزيّر من نسوانهم.. كمان انتو تحرشو عليهم واحدة من السهلة ساكت تنهرهم؟.. لشنو كسر الخاتر دا؟.. ما كفاية عليهم الفلس الهم فيهو.. كمان انتو تكاوهم بيهو؟.. يا اخي خلو عندكم أنسانية شوية.. يعني ممكن البت البتنضم في الموبايل دي تجبر بي خاتري شوية وتقول لي “معليش يا انت.. نحن عارفين ظروفك كعبة وإن شاء الله بعد ما ربنا يفتح عليك وتعبيّ رصيدك ممكن تتصل.. واللهِ واللهِ ومن قال واللهِ ما خلا شي.. لو ما خايفين نخسر ونقفل الشركة دي، علا نخليك تنضم بي ساكت”.. انتوجربو يمكن أنا أتحسس واتجوعل وامشي اديّن قروش وادخّل رصيد.. واحلف ما تتفنجر علي بنية أفو!.. أو لو مصريّن انكم تتفاسلو علي جماهير الشعب ،إتفاسلو، علا أصلّو الشغلانة.. يعني بدل ما تقول لي (إن رصيدك.. .. الخ).. تقول لي وبنهرة (هوي يا البومة دا.. انت داير تنضم سااااااكت كدي؟.. ملح؟.. جيت لي أمك.. نان سجمك التنضم بو ما عندك.. امشي جيب رصيد وبعدين تعال انضم).. أو في حالة انشغال الرقم تقول لي (الرقم الدايرو.. قاع ينضم .. كدي شيل الصبر شوية).. ولو ضربت تاني ولقتو مشغول برضو تقول لي (لي حسي زولك ينضم.. انت ماك عارفو برااااااية.. ؟؟. وما بيفك الزول بي هينة؟ ماك عارفو؟ ماك عارفو؟”، ولو ضربت للمرة التالتة وكان مشغول تنط البنية وتقول لي “أجي يا يمة.. حليلو هو.. ما قلنا لك الزول دا قاعد ينضم.. لوك الصبر .. لوك الصبر.. غايتو جنس لياقة.. جنس ديل يسوو موبايلات لشنو؟ علا خاتين نحن قدر مافي كعوبية اديناها شريحة وقولنا ليها انضمي”.. لو الرقم خارج الخدمة البنية تقول “الرقم دا رقبتو مو عندنا.. ماهو في.. أو سيدو قافلو.. قافلووووووو ما داير زول يناضمو”.. ولو حاولت تتصل تاني تنط عليك البنية وبزهج تقول :وووووووب علي أنا يا أخواني.. اطير وين؟ واقبل وين؟ من الراجل دا؟.. يا راجل ما قلنا لك الرقم دا مو عندنااااااااا ومقشرّن مقفّل”.. بالطريقة دي.. الناس تخاف من النضم والهرجة وتضمنو حقكم.. وتوفرو الرد الآلي علي الناس.. أنا بعرف زول ما بيتكيف لي شي في الموبايل علا نضم البنية البتقول لو رصيدك كمل.. وشايفو الأيام دي يشتت في نضمو وقال داير يعرس.. أها تبقو لي زي دا عاد؟!

[/JUSTIFY]

الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس