الفاكوك.. و.. الفاسوخ.. و.. الغاسول

مهنة العشابة.. أو العشابين.. هم الناس البيبيعو الأعشاب الطبية والتي مما شك في أن بعضها قد أثبت نجاحا كبيرا.. هذه المهنة تتعرض لكثير من الخروقات والتهجم.. وبقت أكل عيش لي ناس لا ليهم في التور ولا ليهم في الطحين.. وذلك لأن هذه المهنة لا قوانين تحميها.. ولا توجد خلفها مؤسسة تنظمها.. وتنظم متعاطيها.. مثلها مثل بقية المهن.. أقر بأنه يوجد عشابون ممتازون متخصصون وباحثون.. ويشهد معظم المترددين عليهم بخبرتهم وبراعتهم..

لكن الباب الفاتح مشرع للولوج لهذه المهنة خلى كتير من الدجالين والأفاكين والكذابين.. يحوموا في حوشها.. وهم لاشك أنهم خصما على المهنة وخصما على من يمتهنونها بفهم ووعي وإدراك..!!!

دخلت الدكان.. برطمانيات كتيرة واشكال وألوان مرصوصة.. وأسماء كتيرة مكتوب عليها.. مرا واقفة مع سيد الدكان يوصف ليها: “تطلقي بخور الفاكوك.. وبعدو الفاسوخ.. وبعد ساعتين تستعملي الغاسول.. شفتي ديل لو كادوك مكتوب ليكي في نيجيريا يفكو ليكي.. وخلي بالك ديل كلهن الأصليات فاكوك أصلي.. وفاسوخ أصلي أكتر منو وغاسول ما فيهو نضم تب”.

شالت المرا فاكوكا.. وفاسوخا.. وغاسولا.. ودايرة تمشي وعلى وجهها ابتسامة رضا وامتنان قال لها: “عايني جاي لما تجي تولعي البخور قفلي البيت سمح ما تخلي البخور يمرق الشارع لأنو إن مرق الشارع ما بضمن لك يحصل شنو في الحلة؟” قالت لو بكل خضوع: “سمح”..

قبل علي قال لي: “حباااااااااااااابك” قلت ليهو: “حبابك انت دا.. أنا موصيني لي قشر رمان مطحون.. قالوا بينفع الحزام الناري وعندي حزام ناري حاميني امد ضهري، شفتو عبارة عن جمرة من جنهم، وقاعد ادردق فوقها”.. “بلحيل عندنا.. وقشر رمان أصلي أصولية شديدة”.. أداني الربيطة في يدي مسكتها عاينت ليها.. شميتها.. عاينت ليهو: “يا زول متأكد دا قشر رمان؟..” قال لي: “دا كلامك؟ كدي شمو ما فيهو ريحة رمان؟” قلت ليهو وأنا أحاول أن اشم: “والله أنا مطووووول من ريحة الرمان ما بطراها, مصدقك, لكن خايفك تقوم تغلط وتديني فاسوخ ويفسخ لي ضهري دا علي الفسخ العليهو؟”

فنتازيا عشبية:

(ألو)

(ألو.. معليش تلفوني كعب.. هو التلفون بيخليني أتعالج واللاّ أكوس لي علاج؟.. ألو. قلت لك.. أنا متزوجة لي عشرين سنة ما ولدت.. ما خليت دكتور ما خليت نصيبة كدي في الدنيا دي ما جربتها.. كرعي ديل حفن من الجري علي الدكاترة.. حتى أطفال الهنابيب ديل جربتهم.. أطفال الهنابيب ديل شفتهم؟ جربتهم.. ومافي ولا هنبوبة نفعت..)!!!!!!!!

(يضحك): “أبشري.. أقول ليكي وصفة.. بعد تسعة شهور نسلمك شافعك في إيدك.. (يضحك) اللهم اجعلو خير.. عايني جاي.. عاينتي جاي واللا عاينتي غادي؟ (يضحك) اللهم اجعلو خير.. سمح عايني جاي:

تجيبي نبات القندبال، زايد ثمار البرحوص، زايد قشرة نبات الحردويل.. وشوووووووية من جذور السربعوط، ديل تخلطيهن مع بعض وتصوطيهن في نص كباية موية نار وعلي الريق يوم وااااحد بس.. وتلحقي أمات طه”!!!!!