ونســــة في المقابر

اتنين جو مع الجنازة وقعدو بعيد.. في الواطا.. واحد مصنقر وخاتي ايديهو بيناتو والتاني شايل ليهو مجموعة حصايات ويجدع في شاهد قبر قدامو مرة يختاهو ومرة يصيبو وهو يسمع للزول الجنبو “الله يرحمك يا شيخ الخدر.. لكن زول كبير وقديم وعمرو أكتر من تمانين سنة.. رقد في المستشفى ومرق منو أكتر من خمسطاشر مرة في السنة الأخيرة.. مرة رقد ببروستاتا وحبس بول.. ومرة وقع وكسر مخروقتو.. وتاني لمت فيهو حمى ما عرفو سببا شنو؟.. وباقي الرقدات كلها صدمة سكري منها الرقدة الاخيرة الما قام منها دي.. عذب وليداتو.. كل يومين خامنو وجارين على المستشفى.. الصرفوهو عليهو في سنينو الأخيرة دي.. هو ما صرفو عليهم عمرو كلو.. هو مسكين ما كان عندو شي.. لكن ريحوهو وليداتو ديل في سنينو الأخيرة.. خرّف.. بقى بعد مرات يقوم نص الليل ويقعد يغني بي طول حسو:- الدخان والدلكة، خلن عقلي لِكة.. ويمسك عصايتو ويحاول يعرض الا يجي واحد من وليداتو يمسكو ويقعدو ويقول لو يابا أبشر أبشر بالخير وهو يقعد يبشر معاهو.. المرة الكسر فيها “مخروقتو” كان بيغني وقام يعرض عتر لو الإبريق تحتو واتشنقل ووقع علي كراعو.. غير الغنية دي ما عندو شي.. ياخد لو صنة ويقوم يغني: الدخان والدلكة، خلن عقلي لكة.. وبعد مرات يقعد يكورك لي نسوانو الأربعة.. مع انو الأربعة ماتن.. لكن هو مصّر يكورك لهن.. وخصوصا مرتو الصغيرة الاسمها حليمة.. ولو ما جاوبن عليهو.. يقوم علي حيلو ويقعد يكوس لي عكازو.. داير يمسكن يدقهن.. يكورك لي حليمة “حليمة شديتي الحمارة؟”.. داير حليمة تشد ليهو الحمارة وتركّب السرج فوقها.. علما بأن الحمارة زاتا ماتت مع النسوان.. أصلو كان مبسوط من الحمارة دي زي بسطتو من حليمة.. آخر مرة رقد في المستشفى انشبك في ممرضة وقال دي حليمة.. وقدر ما حاولو يقنعوهو انها دي ما حليمة اصلو ما صدق.. ومرة دايرين يحمموهو حلف الا تتحمو الممرضة القايلا حليمة دي.. لكن ما بعرفهم بعدين سوو شنو؟.. الله يرحمو كان راجل طيب وعديل.. بس كان شبكة.. أن انشبك فيك يحلك منو رب العالمين.. اسمع؟.. انت عصام عمل شنو في الشيك؟.. مواعيدو فاتت ليها شهر حسي وما عمل حاجة؟.. غايتو انا بديهو يومين وبعد داك بفتح فيهو بلاغ!.. قلت ليك بالله شفت أمبارح الكورة دي كانت حارة كيف؟.. لكن المريخ لعب والله!.. انت يا عبدالله؟.. صحي عماد عرسو آخر الشهر دا؟.. لكن عماد دا داير يعرس بي شنو؟.. ما عندو اي حاجة؟.. غايتو الا يسوي ليهو مغرم والاخوان يساعدوهو!.. انت الزول داااااك مش حسام؟ الزول دا اصلي ما بريدو.. غياظ خلاس!.. عاين ليهو عامل كيف.. عاجباهو روحو.. اها كب الجماعة دفنو يلاكا”.