سكر معقود.. يعقـِّد

السكروز.. ياهو السكر القاعدين نتصابق فيهو نحن والنمل على شرابو واكلو.. السكروز عبارة عن سكريّن(جلكوز + فركتوز).. الفركتوز هو سكر الفواكه زمان كنا قاعدين نلقاهو.. في فصيلة الخشبيات اليابسة من الفواكه زي التمر والنبق واللالوب والدوم. والليفيات من الفواكه زي المنقة والدليب والذي اختفى كفاكهة (أي الدليب) وازدهر ككضبة فاصبح كل من هبّ ودبّ داير يكضب (يدلّب) فلانا رمى دليبة اي كضب كضبة كبيرة ومن ثم تحولت بي قدرة قادر إلى قنبلة( قنبّل فلانا القوم) اي كضب عليهم وتشتت شمل القوم من اثر القنبلة.. أو قعدو واتبهطو في محلهم إلى أن ينُفخُ في صور عربيات المرور فيقومو من بهطتهم كل يمم اهله وهو فاغر فاه واضعا يديه في جيبه باحثا عن فكة فتجد الرجل يقنبل اهله وذويه.. والمرأة تقنبل جاراتها وصويحباتها.. والمسعول يقنبّل المسعول عنهم.. وغنية القنبلة هي تقصد دي قنبلة (كضبة) سماحة الزول في الطول والعلا يعني يا جماعة دي كضبة الزول لاسمح ولا طويل ولا حاجة زي باقي المخلوقات السودانية ياكل ويشرب ويمشي في الاسواق وينقنق من السوق الولع نار ويمشي اهلو ويرقد ينوم!.. وما زلنا نتسابق مع القرود في أكل الموز.. بعد أن سهلت وسائل النقل والمواصلات أصبحنا ناكل العنب والتفاح لماما.. فنجد ضالتنا من سكر الفواكه.. السكروز يعتبر كعب جدا.. لأنو بيدينا حاجة اسمها السُعرات الحرارية الفارغة يعني سُعرات حرارية ما منها أي فائدة وما معاها اي شي لا فتمينات ولا بروتينات ولا اي حاجة نستفيد منها لصحتنا.. السكر من قصب السكر أو من البنجر.. عندنا هنا القصب هو الناجح عشان مناخنا.. والقصب عشان نمرق منو السكر بمر بعمليات كتيرة.. لازم نجربنو ونكبرتو ونكربنو. الجربنة (إضافة جير) ثم الكبرتة( مخكم ما يمشي بعيد) اضافة ثاني اكسيد الكبريت هنا بيتحول لون السكر إلى اللون البني الفاتح.. والكبرتة المعروفة في ثقافتنا” انتي يا الكبرتوك البنات فاتوك في القطار الطار”اها ديل شالوها ناس خليل فرح من كبرتة السكر،والعلاقة واضحة بين المكبرتين الاتنين السكر والمكبرتة وكلو عند العرب سكر.. والكربنة إضافة ثاني أكسيد الكربون.. وتكربّن فلان أي زعل واتنفخ.. ولما تكربن السكر فيكون زعلان وزهجان.. ولو عصلجت العملية في الحتة دي يكون عندنا سكر مكربن وزهجان وحايم في الدكاكين.. مع انو من المفترض ان تقلل الكبرتة من درجة الكربنة والعكننة.. أها برضو السكر عشان يكون نقي ولونو ابيض بي يمروروهو في اسطوانات شادنها فوق فحم العضام النشط (عُضام الله والرسول دي شفتوها؟ يحرقوها ويسو منها فحم).. يعني نحن قاعدين نشرب شاهينا بي كوارع.. يا حليلنا نجغم وما جابين خبر؟ وبعدين ما معروفة عضام شنو؟.. غايتو لو بقت عضام حمير.. نصيبتنا يعزو فيها!! والشعب السوداني إن سمع نضمي يخلي السكر، وإن ما سمعو، بي عافتوعلا نحن ما ناقصين حمرنة!!