وطن أم ضبيبينة

[SIZE=5][JUSTIFY][CENTER][B] وطن أم ضبيبينة [/B][/CENTER]

من مرقو الانكليز.. ونحن عوتنا لي رب السما.. الانكليز ما وصلو أهلهم عديل.. شكلتنا قامت.. عبود قلبا.. القرشي مات صدفة.. قامت أكتوبر.. الشيوعين رفدوهم من البرلمان.. قامت مايو.. نميري عكليته.. قالو يدقسوهو لما اتعكلت قلبوها تلاتة أيام بس.. القذافي مسك فاروق وبابكر.. والسادات رسل قوات القناة.. قلبوها رجع نميري وقع فيهم كبر ما بيفرز العدو من الصليح.. ونهى الحزب.. وقع فيهم جزر… بعد ما ضربو ليهو الأنصار في ود نوباوي وأبا.. وكسرو شوكتهم.. مرقو الترابي والصادق والهندي.. الجبهة الوطنية.. تدريب في ليبيا.. دخول انصاص الليالي لأم درمان.. يومين ما لاقين زول يشغل الإذاعة سعد بحر فاااات وين ما معروف جابوهو.. دم للركب.. حسن حسين عثمان محاولة فاشلة تانية.. إعدامات في وادي الحمار باتبرا (وادي الحمار دا مرشح يكون وطن بديل للرباطاب المتأثرين بسد الشريك.. شفتو الحقارة دي؟).. ضربوهم برضو.. ودم للركب برضو.. المصالحة ناس جات وناس أبت تجي.. الترابي دخل القصر مع نميري.. قوانين سبتمبر.. قطيع إيدين وكرعين.. وجلد.. وحفلات تعارف للزُناة وأصدقاء الحان في الرادي والناس تسمع.. محمود محمد طه.. إعدام نص النهار يوم جمعة حرو يسلق البيضة.. فليب غبوش ودق الجرس.. انتفاضة أبريل.. سوار الدهب الجزولي.. سلموها في ساعتها.. جوطة في جوطة ما دايرين ناس الجبهة.. قرنق شدّ حيلو.. وعيطة وزيطة وزمبيرطة.. انقلاب الإنقاذ.. الترابي في راسو.. حرب الجنوب.. عرس شهداء.. وطهارة معارضين.. مرقو برا تاني.. جبهة الشرق.. رعاة الإبل والشاة والفهود الحرة.. دارفور ومرتزقة الحروب وتجار النكبات.. وما قتلته الباعوضة بسبب الملاريا من الاستقلال وجاي يساوي ضعف ما قتلته حرب الجنوب ودارفور.. نهزم أنفسنا وتنتصر علينا الباعوضة وفي انتظار أن تحكمنا.. طمع السلطة.. يلغي شعار( هي لله لا للسلطة ولا للجاه).. انشطار أصحاب سقيفة بني ساعدة.. انتصار العسكر.. اندحار الأب الروحي… وانزوائه في المنشية.. انتحار المشروع.. وانتصار الفتن.. اليسار والابتسار نضم يدخل من الأضان دي ويمرق من التانية.. اتفاقية نيفاشا.. طيارات تقع وطيارات تقوم ناس تموت وناس تفوت.. الصادق الميرغني.. حارسين القُبب وراجين السلطة تجيهم وشايلة معاها الزوارة .. لسيدي الحسن وسيدي المهدي.. الحركة الشعبية السودان الجديد.. قلنا خير.. طلعو سودانيّن جنوب وشمال ولا واحد فيهم جديد.. ونحن مشغولين ضبحو الحمير وسلخو الكلاب.. وقاورمة القعونجات.. والرغيف خبرو شنو؟.. والصقط ليهو سنين ما سمعنا بيهو.. والغريبة عائدات زراعة القمح مُدرجة في الميزانية.. الصقط البي يخلي القمح ينجض وينو؟.. واحدة في التلاتة: يا مجنون القمح.. يا مجنون الصقط.. يا مجانين نحن.. لكن باقي لي نحن أقرب للجن.. مجلس وطني وعمم وبدل وتيبان.. وقروش من حقنا.. ونضم كبار كبار.. وناسين إنو الصقط خلى البلد والقمح بلا صقط ما بينفع.. ويسوو في أريتا ميزانية السرور.. كل يومين يستدعو وزير .. ينضمو معاهو.. يلوموهو.. وتاني ما تسوي كدي.. يرجع وزارتو ويصوط في صواطو.. ونشيد أجوف “وطن الجدود نفديك بالأرواح نجود”.. والله تعبنا من الونسة.. ممكن نخت راسنا وناخد لينا غميدة شوية.!!؟

[/SIZE][/JUSTIFY]

الباب البجيب الريح- صحيفة اليوم التالي