الحمار شكروهو.. رقد

شكري يا ام.. و.. القرش ما بهمو.. دا نوع من الشُكُر مدمٍّر.. تقعد أمو تشكر فيهو وهو يشتت في قروشو.. هاك يا طير وهاك يا غراب.. إن لقى ناس في مطعم يحلف إلا يدفع هو.. (علي الطلاق ما في ولا زول يدفع.. أفو).. لو في فنانة بتغني ونسوان يزغرتن.. بس ياهو الكمّل قروشو قصادها.. طاخ يلصق لها.. ويفرتق القروش من لستقتها ويقعد يشتت فوق راسا.. وبعد يكملن يجي يقعد جنبك ويبلّع في ريقو ويقول لك “عليك الله ما عندك لي خمسين جنيه لي باكر”.. تديهو.. الفنانة تغني ليهو شكري يا امو.. يشيل خمسينك وطاخ يلصقها للفنانة. “وتكون امو ميتة ليها عشرين سنة”.. ويجيك تاني يقعد جنبك.. ويتعضّر لك ويقول لك.. “والله غنا الحماس دا قاعد يمرقني من طوري.. وأغبا.. وما اشوف”.. نان بي قروش الناس.. يا عشا البايتات؟ ممكن يكون راقد عند اهلو ويسمع غنية لحفلة ما عندو بيها أي علاقة.. يقوم ويشطّف.. ويبلس جلابيتو ويمشي يشتت قريشاتو ويجي راجع ينوم قرير العين عدمان اسم التعريفة.. والحقيقة غنا الحماس مدمر برضو.. اتذكر في حفلة في مناطقنا في ولاية نهر النيل.. البنات شايلات الدلوكة ويغنن “السوط.. السوط.. يا جنا.. السوط احلى من الموت يا جنا”.. مع اني ما بعرف للموت أي حلاوة.. لكن قدر ما في ضكر فيكي يا الحفلة ملّص جلابيتو وعراقيهو وكشف ضهرو وجاب طاقيتو فوق حواجبيهو واتسند علي عكازو.. ووقف عشان ينجلد بالسوط ويجبّر خاطر البنات القاعدات يغنن ديل.. من عمر تلاتطاشر الي عمر تلاتة وسبعبن سنة.. وحاولت ومعي بعض اهل الخير والأجاويد.. في محاولة يائسة لتقليل عدد الضحايا.. واتكلمت مع اول طفل عمرو من ناس التلاطاشرات وداير ينجلد.. نهرني وهو يقبض على عكازو قبضة من يريد ان يفلق، وقال لي وهو يرفع في حواجبيهو ويهز في راسو في تحد واضح “قُت لك.. أختاني.. أختاني” فختيتو!.. وقعدنا نتفرج فيهم، وقد بلغ عدد الجرحى في تلك الحفلة الدامية ما يفوق عددهم في موقعة المتمة.. ما يزيد استغرابي انو العريس يجلد الجماعة بلا غبينة.. وعليه فإنني أرى في المثل (الحمار شكروهو رقد).. هو أن يكون مثل المرحلة.. وأن نعمل به في كل مناحي حياتنا.. أي زول يشكروهو يسد دي بي طينة ودي بي عجينة.. إن كنت قاعد تبني في بيتك بايدك وجا زول وشكرك.. تنزل من الحيطة وتخليها.. وتجر لك عنقريب في اقرب ضل وتقول لو (أها.. هاااااادي رقدة).. ولو مرا راجلا مبسوط منها ومهتمة بنفسها أول ما يشكرها تاني يوم طواااالي تتبشتن.. وتنكش شعيراتا وتلاقيهو في خشم الباب.. (أها هااااادي بشتنة.).. انتهز هذه السانحة واشيّد بفريقنا القومي وطاقمه الاداري والفني.. والذي طبّق المثل (الحمار شكروهو رقد) لانو نحن في الحقيقة الليمات الفاتت دي.. بقينا نشكّر. في الروادي نشكّر.. في التلفزيونات نشكّر.. في الجرايد نشكّر.. جنب ستات الشاي نشكّر.. في المواصلات نشكّر.. نشكّر لحدي ما رقدو لينا بتلاتة صفر.