بتأمل

بتأمل حال الدنيا.. والميل الكسر الخاطر..* المسَّخ طعم الفرحه.. والباع الريد النادر..* البدّل بينا السكه.. والخلّى الرابح خاسر.. الطيبه بتبقى سذاجه.. والظالم يصبح شاطر..* أغراب بيشيلو همومك.. وحبيبك قاسي وناكر..

****

* أحزان ماليانا مآسي.. وشجون.. والحيله قليله.. شايلين الهم من بكره.. خايفين.. والشيله تقيله..* ماشين في درب الحيره.. تايهين والسكه طويله..* خلونا قراب من الله.. والخطوه بتبقى عديله..* والرضا بالقسمه حقيقه.. بيخلي الدنيا جميله..

* *****

الرحمه كمان مطلوبه.. خلونا خلاص نتراحم..* ليه يعني نسك الدنيا.. وعليها دوام نتزاحم؟..* كل واحد عندو نصيبو.. مكتوب من قبل العالم..* مفروض لا “نجوط” لا نكره.. بالحكمه كمان نتفاهم..* نتعافى وتصفو نفوسنا.. بالحب والشوق نتسالم..

* ******

وبتأمل حال وجداني.. والشوق الهدا كياني..* والريد الساكن روحي.. واللهفه الفيها حناني..* والشجن البكتب ويرسم.. ويطلع صوت أحزاني..* والحظ العاكس وعاند.. وخلاّو متأخر جاني..* والخوف يا غالي تغادر.. وتغيب عن دربنا تاني..

* ****

قررتا أسامحك وأنسى.. قصتنا دي ما بتستاهل..* لازم نعفو ونتسامح.. وشويه كمان نتنازل..* العمر قصير لو يطول.. ليه نحقد وليه نتجاهل؟..* بيناتنا العُشره بتبقى.. وضروري كمان نتعامل..* خليك من غدرك أكبر.. وتعال بالود نتواصل..

* تلويح:*

تأمل.. فإما أن تصبح حكيما أو “مجنونا”.!