كوش نيوز .. أخبار السودان بين يديك

جـنا حشـاي



شارك الموضوع :

[JUSTIFY]

جـنا حشـاي

نضمت أمبارح عن الحضانات القاعدين يصوطو للشفع الدوا المنوّم مع اللبن في البزز.. ويدوهو ليهم.. عشان ينومو.. وهن يتفرغن لي ونستن وفطورن وقرقرابن.. وباقي اليوم يقعدن يصوطن في وشياتن شي أحمر وشي أخدر وشي بنفسجي.. وما دايرات غاغة ولا نبيح وبكا شفع.. الشافع ينوم لمن أمو تجي تشيلو تاني.. ويتم نومتو عند اهلو.. والام تدفع الملايين.. عشان الاهتمام برضيعها وهي غائبة.. .وتديهو ليهن و توصيهن ابقن فيهو عشرة.. وهن ما بيقصرن يبقن فيهو عشرة ملغرام “فاليوم”.. أنا لا أقول كل الحضانات لكن بعضها.. واعيد بعضها برضو ما حاجة ساهلة والموضوع في غاية الخطورة.. أما عن الشغالات في البيوت والبيخلو معاهن الشفع عيييييييك حدث ولا حرج.. ديل كمان سمعت من بعضهم انهن قاعدات يشممن الشافع السعوط أو يختنو ليهو تحت اضانو.. يدووخ وينوم.. .يوم تكون أمو معاهو الشافع يقعد يبكي الضخوية كلها أمو ما عارفة السبب.. وهو يكون خرمان.. والشغالة بهناك تضحك وفي سرها” وقت السفة جا”.. أو يضيفن ليهو دواء القحة.. “انتيهيسامين” أو “سودوافيدرين” مع اللبن برضو.. دا غير السلوك الممكن يتعرض ليهو الرضيع من انتهاك لطفولتو في غياب والديه ممكن تكون الشغالة دي بتعاني من أي خلل نفسي قد يشكل خطرا علي الرضيع وكم من قصص في هذا المجال سمعنا عنها يشيب لها الولدان وخاصة نحن هنا بنشغل أي زول في البيت ما عندنا اي فكرة عنو ونتهاون المهم عندنا انو الشاقع معاهو زول في البيت وخلاص.. أما الزول دا كيفنو ؟ حالتو شنو؟ نفسياتو كيفنها؟ ما عندنا بيها شغلة.. أحيانا ست البيت تتفلهم علي الشغالة وتشاكلها، الشغالة تصُرها ليها وتنتقم منها في رضيعها.. ومثل هذا الانتقام قرأت عنه في الخليج.. من ضمن الحكاوي انو واحدة بتشاكل الشغالة طوااااالي وتذلها.. وكل ما تلد تجيب جنا يتم ستة شهور ويموت.. اكتشفو انو الشغالة تخليها تمشي الشغل وتدخل دبوس في جمجمة الرضيع.. انتقاما من أمو.. وكم مربية أو شغالة قتلت طفل وانتحرت معاهو او حاولت الانتحار.. وقد شهدت شغالة حاولت الانتحار بعد أن القت بتيمان من الطابق التاني في غياب والديهم وذلك انتقاما من والدتهم.. . الرضيع ما بتقدر عليهو غير امو.. وما بتسكتو غير امو.. وجود أمو جنبو ضروري جدا.. أحيانا ممكن ما يكون جيعان ممكن يكون عاوز بس يحس بحضن أمو.. يعني لو مسكتو وعصرتو عليها بي يسكت.. معادلة صعبة مع ظروف الحياة الصعبة والقاهرة.. المفاضلة.. الرضيع او الشغل.. لكن اعتقد أن أصحاب العمل.. مفروض يدو إجازة حضانة لكل ام عندها رضيع حتى لو بنص الراتب والباقي تتحملو جهات الضمان الاجتماعي أو النقابات أو أي جهة أخرى.. أو نكون نحن قاعدين نضحي بأجيال قد نفقد بعضها وقد يكون بعضها مريض جسديا و مشوه نفسيا!!!

[/JUSTIFY]

الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس