داليا الياس

السعادة


[JUSTIFY]
السعادة

كنت مفتكرة السعادة.. بتبقى في المال الوفير

أو نجاح باهر تحقق.. أو سفر أصبح مصير

بس لقيت إنو السعادة.. لو تعيش في حب كبير

وتلقى زول يصبح ملاذك ويبقى في الحوبات نصير

تبقى إنت شريك حياتو.. ويبقى علي قلبك أمير

وفي دجي الهم المستف.. يبقى هو البدر المنير

همسو زي صوت الكمنجة.. وريقو زي طعم العصير

طيفو حاضر في الزوايا.. وفي الليالي يكون سمير

ولو يغيب يوم عن حياتنا.. يبقى جد موضوع خطير

السعادة الصادقة فعلا.. بتبقى بي إنسان جدير

تعترينا عليهو لهفة.. ونذرف الدمع الغزير

أصلو ما الحب الخرافي.. بيبدأ بالوجع الصغير

ويا متيم أعرف انو.. ما في ريدة بلا عذاب

وبين مشاعرك والسعادة.. ألف حيطة وألف باب

وغالبا تلقى الخيانة.. واردة من أقرب قراب

الحبايب ما بدومو.. وبرضو ما بدومو الصحاب

وأوع تتغرّ بجلالك.. مهما تكبر في المودة.. برضو آخرك كوم تراب

السعيد في الدنيا فعلا.. يلقى زول يحفظ غيابو

ولو حقيقة الحظ تبسم.. يبقى من إخلاص صحابو

وخلي بالك من قليبك.. وأوع تجري ورا سرابو

المحبة كتير بتوجع.. وأحلى ما في الحب عذابو

ولو عرفت الشوق ونارو… تاني أصلا ما بتهابو

وتلقى أعذار للبريدك.. وتحتمل جورو وعتابو

الغرام في أصلو حاوي.. وحظ قليبك في جرابو

ونحن هسة خلاص عرفنا.. قصة الحب الحقيقي

إيدي في إيدك مصيرها.. وسكتك صبحت طريقي

والجميل في ريدنا إنك.. كنت في الأول صديقي

وفاهم أفكاري وظروفي.. ونوع برودي ولون حريقي

التعايش فينا مبدأ… وإنت في الأحلام رفيقي

الله يحفظ لينا ريدنا… وبيك يدوم زهري ورحيقي

تلويح:

معاك إنت الزمن بيصفى.. وبدفن همي في النسيان

[/JUSTIFY]

إندياح – صحيفة اليوم التالي