العجب والصيام في رجب.. والعجب حبيبي
في العصر العلينا دا.. أصبح الإعلام ختري ختورية شديدة.. والدنيا دي كلها عارفة كدي.. علا نحن ديل، نحمد الله.. زي أي حاجة مهمة تفوووور وتهمد.. ونحن معانا خبر خير.. بعديييييين نعرف ونقعد نتونس بها مع بعض ونقرقر وأكتر شي نقولها كلو من حكومة الجن دي.. بعد تنتهي الونسة نقوم من قعدتنا البي يتمغا يتمغا.. والبي يشهّق يشهق.. والبي يدخل ايديهو في جيب بنطلونو والبي يلف عمتو تاني ويجيبها لي قدام وياخد ليهو قدلة ولو صادف في نفس لحظات القدلة دي سمع واحدة بتغني “سمحة القدلة فوق مختار” يقدل وفي سرو يقول لها “مختار بتاع حنانك؟.. سمحة القدلة فوقي أنا دا.. انتي ما محظوظة الما شوفتيني”.. والبي يبرم طاقيتو في نص راسو.. ويهجرها فوق قنقونو ، وبعد داك كل واحد فينا يمشي يشوف ليهو طريقة يدمر بيها نفسو وأصحابو والبلد.. قلت إن الإعلام أصبح ختري.. لكن نحن يا حليلنا.. نحاكي في الناس وما بنعرف.. حتى الحكا دا.. اشتر.. الناس سوو قنوات فضائية نحن جرينا سوينا قنوات.. واي زول عندو قرشين عاجباتنو ومضيقات خلقو سواهن في قناة فضائية يا شارك زول وفي النهاية اتشكلو واتقرضو.. وخلو الناس الشغالين فيها مساكين كل واحد ايدو فوق قلبو لو قفلت يمشي وين؟.. والله قاعدين يحننوني.. بالرغم من اني أنا أكتر زول بحنن.. او يكون براهو ويقعد يجرس لنا”ما جايبة همها”، يجرس لنا نحن، الغبيان، “قفلها يا أخي.. هي زااااااتا ما عندها طعم.. زي اخواتها”.. العندو قرش يحنن عمتو ويجي يتفرجخ لنا في الشاشة ويعمل بـــــ (البلقى هواهو يضري).. ويقعد يضري فوقنا ونحن نتملي (شرا).. ويقرصنا ونتحكك للصباح.. الموضوع ما موضوع تغير اشخاص.. يشيلو زيد ويجيبو عبيد.. وزيد وعبيد الاتنين فهمهم وااااحد.. القصة كلها دايرة ناس مؤهلين.. عارفين ومدركين خطورة الاعلام.. كل الناس البيجيبوهم تلقى الواحد يقاتل ويدافس ويعافس ويعافر عشان يبقى مدير المؤسسة الفلانية.. طموحو كلو يبقى مدير وخلاص.. ويجي داخل يقدل.. ومارق يقدل.. والموظفين يخافو “يسووو شنو مساكين؟ أكل عيش”.. وتضخم فيهو غريزتو الاستبدادية، و يتبسط انو خوفهم.. يكون مدير لكن ما عندو للمؤسسسة دي أي حاجة غير انو مدير ولو داير تقابلو السكرتيرة بعد ما ترمش مية واربعين رمشة في الدقيقة وتقعد ليك بالجنبة وتقول ليك”عندك مواعيد؟”.. سؤال غبي.. حسب فهمي لو عندي مواعيد مفروض تكون عن طريقك يا السمحة أم عجن!! تقول لها لا.. طيب نقول ليهو منو؟ قولي ليهو فلان؟.. تدخل وتجيك وتقول ليك قال ليك لحظة عندو اجتماع.. تقعد نص ساعة.. وبعدها تدخل تلقاهو براااااااهو الله ورقبتو.. وفاتح اللابتوب.. تنضم وهو شغال. ولا يعاين ليك.. في النهاية يقول ليك.. “خلي رقمك مع السكرتيرة وبنتصل عليك”.. تمرق تخلي رقمك.. . شخصي المنتظر لله من سنة 2010 مدي رقم تلفونو ولي حسي ما تصلو عليهو.. وكل ما أسمع زول مهم مات أقول”إن شاء الله ما يكون هو المات.. قبال ما يتصل علي”!!
الباب البجيب الريح- صحيفة اليوم التالي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة