المشتهي الحنيطير.. يطير

سبق وأن ذكرت أن الطلاق كعب.. وأصلو كعب.. وفي مجتمعاتنا اكعب شي قبال الموت.. أكعب تلاتة حاجات عندنا بالترتيب التنازلي من حيث القوة والخلعة (الفلس.. الموت.. الطلاق).. محيراتني نسوان موريتانيا الواحدة يطلقوها تحتفل وتسوي حفلة وتضبح.. وتلوم النسوان الما بيجنها يباركن ليها الطلاق.. ويتباشرن ويتمنن “يا ريتنا بي حالك”.. قالو لانو عندهم المرا البتطلق كتير مرغوبة من الرجال.. تكون مرغوبة وبعدين الاستقرار طاير.. عندنا الطلاق أزمة حقيقة وخصوصا للمرأة.. أزمة اجتماعية وأزمة نفسية.. وبعض المطلقات الدنيا تبقى لهن اضيق من خرم ابرة.. عزيزتي المطلقة اعرفي انو الطلاق ما نهاية الحياة.. لكن بداية مرحلة جديدة.. في بدايتو وهو طازة المطلقة بتعاني.. يجب أن تتجاوز المطلقة مرحلة ما بعد الطلاق.. من حزنتحزن لكن لا تدع الحزن يسيطر عليها.. عدم تعميق الإحساس بالذنب.. وإنها هي السبب في الطلاق وإنها فرطت.. وإنها لازم كان تتحمل وتصبر شوية.. لوم النفس الشديد في الظروف دي كعب.. برضو تختار ناس مقربين منها تثق فيهم وتطمئن ليهم ويكونو متفهمين وضعها تمام.. وتختا الناس الممكن يزيدو من معانتها.. برضو تهتم بصحتها وتاكل كويس ما تحرد اللكل.. وكل مرة قاعدة في طرف عنقريب ومتمحنة.. تحاول تختلط بالناس الوناسين المرحين تختا الناس النكد “بصراحة الناس النكد في الظروف العادية ما حبابهم”.. لأنها هي أصلا ما ناقصة نكد.. تركز على المسلسلات والأفلام الكوميدية برضو.. وتختا الأفلام النكدية.. برضو تقلل من الاستماع للأغاني الممكن تعمق فيها حزنها “الجرح جرحي براي.. منو البقاسي معاي”.. ما تكون حساسة تجاه الواقعة.. وأي تصرف واي كلام تفتكرو اتقال عشان هي مطلقة.. في ناس مضرين لو اكتشفو الحتة دي بيسوكي شغلة وونسة..

الكلام دا ما معناه تنسى الماضي.. لا.. تناقشو بحيادية.. وتشوف الغلط وين كان؟.. وتخلي حكاية تحقير التجربة بترديد “رضينا بالهم والهم ما رضا بينا”.. وتصحا وتعرف انو كان هم السرور.. و”المشتهي الحنيطير يطير”، وهي تكون مشتهياهو وقلبها مقطوع عليهو علا دايرة تخفف علي نفسها.. وأن تعترف بالغلط لو كانت غلطانة.. ما ترهن نفسها لفشل التجربة.. وما تلوم نفسها ولا تلوم طليقها.. تحاول تتعرف على نفسها.. وعلى سلبياتها في علاقتها الفاتت.. عشان لما تدخل علي تجربة تانية تكون عارفة،.. ولو ظهر شريك جديد تحدد الصفات العاوزاها فيهو.. ونسبة العيوب ومدى خطورتها على استمرارية الحياة. ما تكتشف عيوب وتقول بعدين بمرور الوقت ح تتصلح.. كو.. في ناس تقعدي تعافري فيهم عمرك كلو وما يتصلحو.. والفشل للمرة التانية مُر..

الزواج بيحصل لأسباب أهمها ببساطة:-

*الحب.. والحب احينا بيضلل الشخص ويديك قراءة خاطئة.. بمرور الوقت تكتشف العيوب وتصاب بإحباط.. مما يهدد الحياة الزوجية

*والحاجة الملحة للإحساس بانك مرغوب.. والإحساس دا موجود عند كل البشر.. ولما تشبع الرغبة دي بعد كدي بتقعد تتلفت

*الخوف من الوحدة.. وقعاد براك.. والتوق لأن يكون في زول تهتم بيهو ويهتم بيك.. وقانون (ضل راجل ولا ضل حيطة)

*الإنجاب وتكوين أسرة..