الدنيا لسه بخير

الدنيا لسه بخير ما دام وشينا صبوح

ما دام في لسه أمل وجوانا باقي طموح

حنعمِّر التاريخ ونشيِّد جبال وسفوح

نبني المحبة وطن ونبني الريادة صروح

وحا ترحل الأحزان ما فينا زول حينوح

نمسح هموم النيل ونداوي فيهو جروح

وعشان وطنَّا يعيش عادي بتروح الروح

****

الدنيا لسه بخير لو لسه بينا ثقه

نتقاسم الأحزان ونوزِّع الصدقه

نحفظ عهود الريد ونشيلو شوق وشقا

ونصبر على المافيش ولا بد يوم نلقا

***

والدنيا لسه بخير ما دام في لسه ضحك

ما دام في لسه عيون مليانة شوق وصدق

ما دام في جار ضكران كفكف علينا مرق

لمَّن سِمِع بالليل صوت نسمة شايلة ورق

وبي سرعة فتح الباب قايل الحرامي سرق

***

يا ريت يدوم الخير بيناتنا بالأحلام

نحلم نشوف كل زول ناجح ولي قدام

نفرح عشان فرحو نطرا ونقول يا سلام

ما أصلو حظ الزول من قسمة الأيام

ما بتدي قالو حريف وأقدارنا ماها كلام

***

والدنيا لسه بخير ما دام في بر ممدود

رغم الكذب والزيف والقالو اسمو جحود

بنشوف جمال النيل مزروعة جنبو ورود

تشهد على العشاق تسمع وعود وعهود

وتفوح بعطر الحب لو حتى بينا صدود

***

والله كل الخير في بسمة الأطفال

فيهم بشوف النور والخضرة والآمال

طيبين ومتصافين في معظم الأحوال

فيهم جمال الكون وبينهم حنان ووصال

لا فيهم النصَّاب لا فيهم المحتال

عايشين على الموجود مهما يكون الحال

مع إنهم شُطَّار وبارعين في كل سؤال

وإن شاء الله ليهم يدوم الخير في كل مجال

والدنيا لسه بخير!!

تلويح:

وكل عام ونحن والدنيا بألف خير.!!