القلم يزيد البلم

أحيانا وإنت المتعلم المتفلهم المتقرضم.. تلقى نفسك وقفت قدام جملة عصلجت عليك وغلبك تقراها كلوكلو … وتكون الجملة بسيطة… لحدي ما تستعين بوليّد صغيروني ويا دوب في تالتة اساس… وعشان ما توريهو انك غلبتك القراية.. تقول ليهو انت في سنة كم؟ يقول لك في تالتة… طيب انت كان شاطر اقرا النضم دا؟… وتتفجأ انو الشافع قرا الجملة بكل طلاقة .. واخد لو ضحكة وراها… وفي سرو يكون قال والله يا عمك انت داقس!… وفعلا تكتشف انك داقس وانت من حملة البكالريوس او الماجستير او الدكتوراة في اللغة العربية… وغلبتك جملة زي دي…… لا تحزن اهلنا بيقولو القلب يشوف قبال العين…القراية فن …فن راقي.. ما اي زول يجيد الفن دا…وبرضو زي ما هو فن تلقى فيهو ناس متسلبطين….. ربنا يبتليك بواحد يقرا كتاب … و يزنقك ويقعد يفند في النضم الفي الكتاب .. وتكتشف في النهاية برضو انو صاحبنا قرا الكتاب غلط وفهم غلط.. لكن عشان هو عامل فيها مقددها.. وابو العريف يصر على فهمو الغلط دا.. ويقعد يغالطك… زي دا براحة تطنشو.. وما تشتغل بيهو شغلة…وتاخدو قدر عقلو وتقول ليهو نضمك صح… هو فوق كم؟…… برضو الحالات النفسية والذهنية للقارئ ليها اثر في مدى وكيفية فهم القارئ لما يقرأ…مثلا جملة زي(ذهب الولد إلى المدرسة)…. لقيت الجملة دي واقعة… لو كنت زول وليداتك ماشين المدرسة ودايرين منهم اقساط وناس المدرسة مضايقنهم.. انت طوالي ح تحس بعداء للجملة المسيكينة دي…ولو كنت ولدك جا اول الشهادة ح تحس بحب شديد للجملة دي… اما الزول الماشي يفتش للدهب في خلا النجيم وام دومة… ح يقيف جنب كلمة (ذهب)..دي مسااااافة.. ويحلم بانو قاعد يحفر ولقى ليهو عرق دهب…بدون ما يحس يحيل الفعل (ذهب) إلى معدن نفيس وغالي..اما لو قرتا واحدة جاهم حرامي وفلاّهم ولقط دهبياتها كلها.. طوالي برضو ح تركز في كلمة (ذهب) دي… وتلفح توبا وتمشي ناس البوليص وتسعلهم قبضو الحرامي واللا لا؟….اما لو قراها واحد مرتو ولدت وجابت ليهو ولد… وهو مزنوق ومفلس وجيبو سخانتو مكوة…برضو ح يعادي الجملة من منطلق انو حق السماية ما لاقيهو بعدين لما الولد يكبر ح يجيب حق المدرسة من وين؟…..برضو سماع الجملة … ليهو دور… تسمعها من منو؟… وعلاقتك بيهو شنو؟… وبتريدو واللا بتكجنو؟….. وبرضو الخلفية المعرفية مهمة…اذكر ونحن اطفال وكنا نردد نشيد طلع البدر علينا…. وفي مقطع (ايها المبعوث فينا)…. كنا نردده كعموم اهل السودان.. ايها المبعوس فينا…وعندما سالنا المدرس عن معنى كلمة (مبعوث)… وقالها (مبعوس)… اجمعنا على أنها أيها الما بيعوس فينا ..عواسة الكسرة والقُراصة….. هنا الموضوع موضوع فهم ومعرفة ولا اعفي اللهجة وتأثيرها..والفهم قسم! أقول قولي هذا….. وادعو قرائي الكرام ان يقرو المقال من الاول..!!!!!